Video call tali sa iyang inahan, ang handumanan ni Junalyn Abellanosa dihang gisaulog niini ang iyang adlaw nga natawhan sa miaging tuig.
Apan karong 2021, wala nay video call nga mahitabo tali sa iyang Mama Emma alang sa kasaulogan sa iyang 41st birthday.
Niadtong Marso 31 ning tuiga, namatay ang iyang inahan gumikan sa sepsis.
Matod ni Junalyn, lahi ang kasaulogan sa iyang birthday kon naa ang presensiya sa iyang inahan.
“Dako og kalahian gyud. Hard to explain, basta dako ang importance sa presence sa mama,” padayag niini.
Niadtong Hunyo 8, gisaulog ni Junalyn ang iyang birthday kuyog sa iyang mga kauban sa trabaho.
Sa wala pa ang pandemiya sa Covid-19, naandan nila sa iyang pamilya nga mangaon sa gawas kon magsaulog sa iyang adlaw nga natawhan.
“Then last year, since layo man ko niya, I mean separate ko og balay, video call ra gyud mi, then nagpadala kog food,” asoy ni Junalyn.
Suod ug pinangga ni Junalyn ang iyang inahan.
Nag-edad pa lang siya og 19 anyos, siya na ang nagsuporta niini. Niadtong tuig 2,000, namatay ang iyang amahan nga si Leonardo.
Nagsud ug gawas na sa ospital ang iyang inahan gumikan sa lainlaing sakit.
Sa kasaulogan sa iyang birthday karong tuiga, panghinaut niya nga padayon nga makabaton og maayong panglawas.
“Kay para nako, mao na pinaka-important. Dili ka makabuhat sa imong gusto kon naa kay sakit,” dugang niya.
Human sa iyang trabaho, niadto siya sa St. Joseph Parish sa Barangay Tabunok, siyudad sa Talisay aron magpasalamat sa Ginuo sa iyang kinabuhi ug sa tanang mga grasya nga iyang nadawat. (SCG)