Binasi sa Ezekiel 17:22-24; Salmo 92; 2 Taga-Corinto 5:6-10; Marcos 4:26-35
Nagbaha lang sa “automatic” nga mga galamiton ang atong modernong kalibotan. Naa man gani tay gitawag nga ATM kun “automatic tubig machine”. Naa poy “automatic vending machine” diin pinaagi sa paghulog og sinsilyo o salapi, makapalit kita og makaon bisag walay tindero. Ilabina karon nga may gitawag pa nga AI kun “artificial intelligence”, mas komplikado pa nga bulohaton ang mahimo sa mga makina. Makita kini nato, pananglit, sa mga awto nga mahalon nga daghan kaayog “automatic” nga mga mabuhat niini.
“Ang gingharian sa Dios sama sa usa ka tawo nga nagsabod og binhi ngadto sa yuta. Ug natulog ug nagtukaw gabii ug adlaw, ug ang binhi miturok ug mitubo sa paagi nga wala niya mahibaloi,” miingon si Jesus. Kini diayng pagkaawtomatik makita kini sa kinaiyahan.
Midugang si Jesus: “Sa iyang kaugalingon ang yuta mipagula, una sa dahon, dayon sa uhay, dayon sa tibuok lugas diha sa uhay.” Gilibotan kita niining maong katingalahang reyalidad matag adlaw kon abrihan lang nato ang atong mga mata. Apan dili lamang kini natural nga reyalidad kondili reyalidad usab sa natad sa espiritu. Adunay gahom ang gingharian sa Dios nga molambo gawas sa gahom ug pag-amoma sa tawo. “Built-in” ang milagrosong kinaiya niini.
Mabasa nato sa libro ni propeta Ezekiel ang awtomatik nga kinaiya sa presensya ug gahom sa Dios. Miingon ang Ginuo: “Ako mismo magkuhag salingsing sa kinatumyang bahin sa sidro, ug itanom ko kini sa kinahabogang bukid sa Israel; mananga kini ug mamunga ug mahimo kining matahom nga sidro.” Nagpahipi na diha sa salingsing ang gahom sa Dios nga ang sangputanan mao nga kini mahimong puy-anan sa tanang matang sa mga mananap ug landong sa mga langgam nga magsalag niini. .
Samtang ania pa kita sa kalibotan, usahay mataligam-an, bisag sa mga magtutuo, ang nagpahipi nga gahom sa Dios sa mga panghitabo sa kinabuhi. Miingon si Pablo: “Nasayod kita nga samtang ani akita niining lawasa, layo kita sa puloy-anan sa Ginuo.” Mao nga ang gikinahanglan mao nga “maglakaw kita pinaagi sa pagtuo ug dili pinaagi sa makita.” Pagtuo maoy gikinahanglan aron nga ang tumutuo makaduyog ug makasinati sa nagpahipi nga gahom sa Dios.
Gahapon maoy ika-123 nga tuig sukad sa atong pagdeklarar og kagawasan gikan sa España. Niadtong 1946, adunay poy laing dokumento nga nagdeklarar sa atong kagawasan sa Estados Unidos. Niining mga panahona nagsangkiig ang atong nasod sa pag-angkon sa Tsina sa atong teritoryo sa “West Philippine Sea.” Sulod sa atong nasod daghan pa sad ang dili gawasnon gumikan sa kagutom, kahadlok, adiksyon, ug uban pang mga butang.
Ang labing uyok nga gamot sa atong pagkadili gawasnon mao ang sala. Dili awtomatik ang pagkagawasnon. Nanginahanglan kinig pagbulig gikan kanato sa grasya ug gasa sa Ginoo. Nanginahanglan kini og paghinulsol ug pagdawat sa pulong sa Dios. Bisan pag sa kinatumyan, ang pulong sa Dios molambo lang og iyaha, ang pagdawat sa tawo niini usa ka grasya nga gihatag kanato sa Dios.
Nahilakip na ba kita sa awtomatik nga paglambo sa buhing presensya sa Ginuo?