Mabalaka kog samot kon makabasa sa mga epektibong pamaagi batok sa Covid-19 ug kapaspas sa pamakuna didto sa ubang nasud sama sa Vietnam ug Taiwan. Dayon mosumpay nga palpak ang pagdumala sa panglawas dinhi sa Pilipinas.
Bisan unsaon man gud sa propaganda sa kagamhanan, di nila matabunan ang kamatuoran. Ang performance sa kagamhanan sa Pilipinas palpak. Ug ang katawhan maoy nag-antos.
Dayon, makabasa ka sa mga post ug komentaryo sa mga fans sa administrasyon nga nagsigig dayeg. Bisan unsaon kuno pagdaot sa kagamhanan, si Presidente Rodrigo Duterte naa gihapon sa Malakanyang. Inamaw nga argumento kay hangtod sa Hunyo sa 2022 pa man ang iyang termino.
Sumpayan dayon nga ang iyang anak nga si Davao City Mayor Inday Sara Duterte-Carpio maoy makadaog sa piliay sa 2022.
Ambot kon nagbasa ba o naminaw sa mga balita kining mga diehard fans sa mga Duterte. Apan apil sa nag-una karon sa pagsaka sa mga kasong Covid-19 ang Syudad sa Davao.
Ambot lang niining mga inutil nga mga gurs nga naa sa Malakanyang. Di man maka-supply og sakto sa mga bakuna. Kon paspas unta nga makab-ot nato ang herd immunity, mas paspas kitang maka-abli nga gawasnon sa atong ekonomiya.
Samotan pa niining mga lider nga wala motuo nga gikinahanglan ang bakuna. Ablihan lang kuno dayon ang ekonomiya. Ngano? Kay luoy ang katawhan nga daw gipriso sa balay.
Nabalaka lang kini sila nga hapit na ang piliay ug nagpabilib dayon nga ang interes sa katawhan kuno ilang giapas. Ingna lang gyud nga namulitika mo.
Nakaingon ko nga namulitika kay kining kontrobersya sa flight diversion, mas nag-una man ang politika sa mga rason sa mga politiko.
Sa Vietnam, ilang gibasi sa siyensya ug panglawas ilang mga lagda kabahin sa moabot nga mga langyaw. Mag-testing dayon inig abot sa airport apan 14 ka adlaw ang quarantine.
Apan dinhi sa atua, mopakpak ta kay pamub-an ang mga adlaw sa quarantine. Luoy kuno kaayo ang mga OFW ug ROF lakip na ang ilang pamilya. Makabawos kini sila karong umaabot nga eleksyon.
Apan nabalaka ko kay nikatap na karon ang mga bag-ong variant ug kumpyansa ra kaayo kita. Nagpadayon na og saka ang mga kaso sa Mindanao ug ubang lalawigan sa Visayas. Di ko mahibulong nga mobalik sa pagsaka ang mga kaso sa Covid-19 dinhi sa Sugbo.
Kon mao may mahitabo, aw manguros na lang ta. (DM nako sa @anol_cebu)