Onse ka buwan pa sa dili pa ang eleksiyon ug sa Oktubre pang filing sa certificate of candidacy. Apan karon pa lang mora na og campaign period labi pa sa social ug mainstream media. Wa pa hinuoy campaign o election materials sama sa posters. Apan ang mga pulitiko nagsige na og pahigayon og mga pulong-pulong ug consultations sa mga botante bisan ning pandemiya.
Di pa sila makiha og electioneering kay di pa sila makonsiderar nga kandidato. Mipakita pa man sila og interest sa pulitika. Ang uban maayo na kaayo mopahiyom ug manglamano sa mga tawo. Maayo na kaayo kunuhay motabang. Pero ambot kon wala pa ang umaabot nga eleksiyon, mao ba kaha kini ang ilang ipakitang taras ngadto sa katawhan?
Ang uban nagpa-advertise na man gani sa mainstream media (radyo, television ug newspapers) nga morag gipagawas nga advocacy kunohay nila. Sama aning duha ka mga senador. Ang usa nangangkon nga ‘trabahador sa senado,’ diin iyang giladlad ang iyang nahimo sa Senado. Ang usa iyang gipagawas nga concern kuno siya sa mga magtutudlo mao nga iyang gipa-una sa pagbakuna. Niadtong birthday ni Davao City Mayor Inday Sara, tag-full page sa newspaper ang ilang birthday greetings. Unsa may ilang tumong? Aw, aron mahinumduman sa katawhan. Klaro kaayo nga misakay sa panahon.