Kon nagbiseklita ka ning panahuna, imo nang na enjoy ang kaanindot ini. Naka exercise, naka bonding sa pamilya ug mga higala. Nakaduaw og mga lugar nga wa pa nimo maadtoi ug nakakaon sa lamiang mga pagkaon nga sagad wa pa nimo madiskobrehe. Akong gipasabot mga kan-anan nga lamian diay, apan wa mo pa mahibaw-i nga naa diay.
Daghan sa mga biker maayo mangita og lamiang mga kan-anan. Pangutana og biker nga taudtaud nang gasikad ug nakasuroy na bisan asa kon asa ang lamiang linarang, bakasi, Bisayang manok nga inasal o sinabwan, kape nga barato apan lamian. Sagad sa mga biker makatubag niini.
Sa dugay nakong kuyog kuyog og sikad sa akong mga higala, akong natilawan ang mga pagkaon nga lamian sa mga tindahan nga ordinaryo ra kaayo. Sa among mga tapoktapok, diha usab nako mahibaw-i ang maanindot nga mga pit stop kon magsikad.
Kon bag-o ka pang nagsikad, kuyog sa dugay nang nagtindak kay seguradong ma enjoy ka. But careful lang sab sa biyahe. Kinahanglan makahibawo ka unsa ni ka layo ug kalisod sa agianan. Kaniadto, dunay mga higayon nga nagmahay ko sa pagkuyog kay pastilan, makaingon kang mas maayo pang nanglaba ka na lang sa inyoha.
MAKAT-ON RA
Sagad gyud sa publiko mo-resist sa mga kausaban bisan kon ang tumong niini mao ang kaayuhan. Sama aning bike lanes nga gipamutang sa Metro Cebu, labina sa Dakbayan sa Sugbo. Daghan ang wa ganahi kay napahakan og dako ang karsada.
Di exempted niini ang bike lane sa Fuente Osmeña. Sa akong tan-aw, kuyaw kaayo ni sa mga biker kon magpataka lang sa pagmaneho ang mga driver sa mga sakyanan nga mo-park ug nag-park. Gikinahanglan nga duna gyuy mga parking aide nga mogiya sa mga sakyanan nga mosulod ug mogawas sa dapit samtang bag-o pa kini.
Sa una nakong tan-aw, gikuyawan ko kay kuyaw tuod sa mga biker nga maigo sa sakyanan nga motuyok sa rotunta. Apan nakabasa ko og post sa usa ka biker nga nag-bike-to-work nga ang gibutangan sa lane maoy agianan niya ug sa ubang bikers.
Matod niya nga di sayop ang pagbutang sa lane sa Fuente Osmeña rotunda. Motuo ko kay duna siyay experience. Ang publiko maanad ra kadugayan ug maka-adjust ra.
AGII
Ambot kon nganong di moagi ang mga biker sa mga bike lane. Tungod lang ba sa nagbabag nga mga sakyanan di na lang again ang mga bike lane? Kon again ang mga bike lane, ang mga driver sa mga sakyanan mopatuo ra na.
Mosamot na unya na silag tuo kon magsugod na sa pagpanakop ang mga bike patroler nga giumol sa Sugbo Bike Lanes Board nga gipangulohan ni Atty. Gerry Carillo. Hinaut nga mosabot ang mga driver ug uban pang naapektuhan ning mao nga proyekto sa national government nga gihatag sa mga local government unit.
Wa ni gahini og pundo aron usik usikan. Gigahinan ni aron pagdasig sa publiko nga mogamit sa biseklita isip alternatibong transportasyon.