Duha ka mga construction worker nga giingong big-time pushers nasikop sa sunodsunod nga buy-bust operation Biyernes sa gabii, Hunyo 11, 2021 sa Upper, Brgy. Poog, dakbayan sa Toledo.
Si Pedro Cabanilla Mag-aso, 38, ulitawo, nagpuyo sa nahisgutang lugar, nakuhaag 14 ka gamayng putos sa shabu, usa ka medium nga putos, P550 halin sa ilegal nga drugas, P500 buy-bust money nga gituohang halin sa illegal drugs.
Ang drugas nitimbang og 7.20 gramos nga mobalor og P48,960.00 sa Dangerous Drugs Board (DDB) value.
Samtang wa pa kaabot sa usa ka oras, laing construction worker ang nasikop sa Sitio Curvada, Brgy. Poog,
Si Police Lt. Col. Junnel Caadlawon, hepe sa Toledo Police Station nga nahinabi sa Superbalita Cebu, niila sa suspek nga si Clint John Cabaluna Taveros, 24, nagpuyo sa nahisgutang lugar. / GPL
Si Caadlawon nibutyag nga big-time ang duha ka construction workers nga taud taud na nilang gi-monitor.
Nakuha nila sa possession ni Taveros ang walo ka gamayng putos sa shabu, pito ka medium size nga putos sa shabu, buy-bust money nga P1,000, halin nga P1,000, usa ka paltik nga .38 calliber revolver nga dunay tulo ka mga bala.
Ang drugas nga nakuha gikan kang Taveros motimbang og 50 gramos nga mobalor og P340,000. (GPL)