Namatay ang usa ka driver sa motorsiklo human nibangga sa mixer truck ala 1:30 sa kaadlawon sa Sabado, Hunyo 12, 2021 sa national highway sa Brgy. Sto. Niño, dakbayan sa Toledo.
Si Ben Michael Balasabas Mosquera, 21, ulitawo, taga Brgy. Buanoy, lungsod sa Balamban patay nang niabot sa tambalanan sa dakbayan sa Toledo.
Sa imbestigasyon ni Police Staff Sergeant Nicanor Goc-ong, sa Toledo Traffic Police, si Mosquera gikan sa Brgy. Matab-ang, dakbayan sa Toledo sakay sa iyang Honda Click nga motorsiklo padulong mopauli.
Kusog ang iyang pagpadagan ug sa pag-abot sa lugar, wa siya makabantay sa Isuzu mixer truck (# RFE281) nga gimaniho ni Ruben Caballero Daan, 51, minyo, taga Brgy. Cansojong, dakbayan sa Talisay, kay way early warning device.
Wa mosaler ang helmet ni Mosquera gumikan sa kakusog sa dagan.
Nasuta sa mga imbestigador nga way early warning device nga gibutang sa dapit aron unta dayon makabantay si Mosquera.
Samtang pito ang nangaangol human ang traysikol gidaro sa mini dump truck alas 2:55 sa hapon sa Biyernes, Hunyo 11, 2021 sa national highway sa Brgy. Ilihan, dakbayan sa Toledo.
Naangol ang traysikol driver nga si Jesus Dela Cerna, 65, minyo, taga Brgy. Ilihan, Dakbayan sa Toledo.
Lakip sa nangaangol ang iyang unom ka mga pasehero nga nangalandig sa tambalanan nga sila si Monalisa Librea, 52; Marjorie Villasarda, 33; Carla Jane Villaver, 15; Crystaline Villaver, 29; Apple Jane Manus, 18; ug si Catherine Cajocson, 36.
Gitanggong si Daryl Amaba Paran, 23, ulitawo, mini dumptruck driver, taga Brgy. Cambang-ug, Toledo City.
Ang mga biktima sakay sa traysikol gikan sa Brgy. Magdugo padulong sa Poblacion, Toledo City.
Gikasugat nila ang mini dump truck ug gidaro.