Ang Philippine Atmospheric Geophysical and Astronomical Services Administration (Pagasa) sa Mactan niingon nga ang automatic rain gauge sa Department of Science and Technology sa Barangay Lahug, Dakbayan sa Sugbo nitala og 67 millimeters (mm) nga uwan sa Sabado sa buntag, gikan sa alas 6 ngadto sa alas 10, Hunyo 12, 2021.
Kini tumbas sa 335,000 ka barel sa uwan matag square kilometer kay matag usa ka milimeter sa uwan tumbas sa 5,000 ka barel sa uwan matag square kilometer. Si Romeo Aguirre, weather specialist, niingon nga sila nitala usab og kinatibuk-ang gidaghanon sa uwan nga 150.1 mm gikan sa Hunyo 1-11.
Sayo pa, ang Pagasa niingon nga dako ang kahigayunan nga ang gidaghanon sa uwan sa Sugbo sobra sa normal nga 190.4 mmm sa Hunyo.
Kay ang miaging bagyong Dante nidala og 102.7 mm sa uwan sa Sugbo sulod lang sa usa ka adlaw, gikan sa alas 8 sa buntag sa Hunyo 1 ngadto sa alas 8 sa buntag sa Hunyo 2.
Sa usa ka lahi nga interview, si Jhomer Eclarino, weather specialist, niingon nga ang Metro Cebu makapaabot og sagad mapanganuron nga kalangitan nga dunay dakong kahigayunan nga mag-uwan, manugdog ug kilat sa mosunod nga lima ka mga adlaw.
Hinuon dunay mga kahigayunan nga maayo ang panahon tungod sa break sa moonsoon. Ang ting-uwan gideklarar sa miaging semana. Ang average nga temperatura sa mosunod nga lima ka mga adlaw naa sa 25 ngadto sa 31 degree Celsius. (WBS)