SUPERBALITA CEBU

27 ka kilo sa shabu ang target sa pulis

TARGET sa kapulisan ang 27 kilos sa gituohang shabu dihang gihimo ang buy bust sa Police Drug Enforcement Group niadtong Huwebes sa gabii, Hunyo 10, 2021 nga niresulta sa dugoon nga engkwentro nga gikamatay sa tulo ka gikatahapang drug dealers.

Matod ni Police Major Alejandro Batobalonos, hepe sa PDEG 7, nga sa milabayng buwan, nakadawat silag intelligence report nga adunay moabot nga dul-an 30 ka kilo sa gituohang shabu dinhi sa Sugbo gikan sa Luzon.

Gilusad nila ang monitoring kon kinsa ang hagbongan sa mga kontrabando.

Tuod man, nigawas ang ngalan nilang Lihbon Kerr Bargayo ug Christopher Lim, alyas Christopher Aparice.

Usa ka big time drug lord ang nag supply sa illegal nga drugas nga lumad nga taga Sugbo apan mibalhin nag puyo sa Luzon human maka gawas sa bilangoan.

Nailhan na nila ang ngalan niini.

“Ang iyang source coming from Luzon. Naay dako nga drug lord didto but taga diri siya, pure siya taga province of Cebu nga mao na ang among gi monitor karon,” matod ni Batobalonos.

Dugang ni Batobalonos nga kadtong maleta nga gisudlan sa kinilo sa illegal nga drugas puno unta, apan na deliver na ang 17 kilos sa ilang counterpart sa Central Visayas.

Samtang sulod gawas na sa bilanggoan ang mga suspek nga silang Bargayo, Lim ug driver nga si Boyet Rama tungod sa kaso gihapon sa illegal nga drugas.

Matod ni Batobalonos nga si Bargayo adunay daghang kabtangan sa Sugbo sama sa usa ka dakong balay sa Cordova nga gihimo niyang apartment, tulo ka units sa condominium sa lungsod sa Minglanilla ug dakong balay sa dakbayan sa Lapu-Lapu.

Nidako ang illegal nga negosyo ni Bargayo human siya mabilanggo ug nasuod ug nakaila ang usa ka drug personality nga naa na karon sa kaulohan.

Si Lim ang iyang kaabag sa illegal nga negosyo, lakip na si Rama nga maoy ilang hitman.

Gibutyag usab ni Batobalonos nga wala sila magdahom nga manukol ang mga suspek, apan nanagana sila. / AYB

Sa video nga ilang gihatag sa mga sakop sa media nga mi katap usab sa social media, makita nga gipusil ang ilang poseur buyer gamit ang Armalite rifle.

Apan gitug-an ni Batobalonos nga naka bulletproof vest ang iyang sakop nga ang ilawom niini puthaw.

“Mopatay gyud to mga tawhana kay gigamitan gyud nilag Armalite. Dili man gyud ko mokompyansa basta mag operate mi. Ang akung tawo ako gyud na pasul-ubon og vest nga puthaw,” matod ni Batobalonos.

Wala siyay nakita nga sayop sa ilang poseur buyer sanglit ang pagpangihi maoy ilang kontra sinyas kung positibo na nga nahatag ang drugas.

Gituohan ni Batobalonos nga sa dihang mi talikod ang iyang tawo aron magpatuo nga nangihi nadudahan ni nga mo bunot sa armas nga maoy hinungdan nga kini giunhan sa pag pusil sa suspek.

Nahitabo ang binawsanay sa pagpusil apan kusog nga naka padagan ang mga suspetsado pahilayo sa dapit ug wala na nila kini maabti pa.

Si Police Brigadier General Ronnie Montejo mi dayeg sa kalampusan nga nahimo sa iyang mga sakop.

Matod niya nga ang kapulisan padayon nga mohingusog sa kampanya batok sa illegal nga drugas.

“Undang namog pamaligya o gamit anang drogas kay duha ra gyud padulngan ninyo, prisohan o sementeryo,” matod ni Montejo. (AYB)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph