Genoguin: DavSur nagbangutan sa pagtaliwan ni Gov. Cagas

ANIA ang kasaysayan ni Douglas Ralota Cagas sa iyang pag-apil sa natad sa politika sa atong probinsiya sa Davao del Sur.

Napili siyang assemblyman niadtong 1984, uban sa iyang uyoan nga si Alejandro "Landring" Almendras. Siya ang nipuli kang Assemblyman Benjamin Bautista Sr., nga kauban ni Almendras sa unang eleksiyon, ubos sa martial law niadtong 1978.

Apan duha lang ka tuig ang iyang pagsilbi nga assemblyman sa maong probinsiya sanglit nag-people power man niadtong 1986. Apan bisa'g duha ra ka tuig ang iyang pagsilbi isip assemblyman sa atong probinsiya, gikalipay ni Cagas tungod kay ANTI-MARCOS siya, sukwahi sa iyang uyoan nga si Almendras nga PRO-MARCOS.

Sulod sa duha ka tuig gikan 1986 ngadto sa 1988, gi-appoint siya ni Presidente Cory Aquino nga board chairman sa Land Bank of the Philippines (LBP) hangtud miabot ang unang lokal eleksiyon under Cory administration niadtong Enero 18, 1988. Midagan siya sa pagka-gobernador ug midaug siya. Mao usab kadtong higayona ang pagdagan sa iyang paryente nga si Rodrigo Duterte sa pagka-mayor sa Davao City ug midaug.

Nagpa-reelect siya niadtong 1992 ug dinhi mi nagsugod sa pagka-amigo. Apan pakyas siya kay gipildi ni Roger Llanos. Mibalik siya pagdagan sa 1995 sa pagka- gobernador, pero gipildi gihapon siya. Gipildi usab ako niadtong tungora nga misulay sa pamolitika pagka-board member sa 2nd district sa Davao Oriental.

Niadtong 1998, gipatawag ko niya kay modagan siya pagka-congressman sa First District sa Davao del Sur ug midaug siya hangtud natapus niya ang tulo ka termino ngadto sa 2007.

Dinhi mibalik siya pagdagan sa pagka-gobernador ug midaug hangtud sa ikaduhang termino niadtong 2013, wa motapus sa tulo ka termino kay midagan sa pagka-mayor sa Digos. Apan gidimalas kay pildi, hangtud misangko sa pagka-bilanggo sa kasong murder kuno kang Nestor Bedolido.

Mibalik sa pagdagan bisan tua sulod sa bilanggoan niadtong 2016 ug midaug hangtud sa 2019 ug hangtud niadtong Mayo 10, ning tuiga sa iyang pagpanaw gumikan sa Covid-19.

Tungod sa daghang kaayohan nga nahimo ni Governor Cagas, nagbangutan karon ang katawhan sa Davao del Sur sa iyang kalit nga pagtaliwan. Sakit para kanila nga wala nila masaksihi ang haya sa ilang pinangga nga gobernador sa probinsiya.

Isip suod nga higala sulod sa 29 ka tuig since 1992 to 2021, gikan sa akong pamilya, akong ipadangat ang pahasubo ngadto kang Congresswoman Didi Cagas, ang atong bag-ong gobernador Marc Cagas, Vice Governor John Tracy Cagas, Digos City Mayor Josef Fortich Cagas ug sa mga Cagas family, CONDOLENCE SA INYO.

Manghinaut ko nga inyong ipadayon ang legacy nga gibilin sa inyong uyoan nga dili ug dili hikalimtan sa katawhan sa atong probinsiya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph