MGA biyahe sa bus sa Davao City Overland Transport Terminal (Dcott) mas mikubos pa sa dihang ang siyudad gibalik sa modified enhanced community quarantine (MECQ).
Gisulti ni Dcott head Aisa Usop nga mga biyahe sa bus nagsugod na og hinay-hinay nga manormal sa dihang ang mga kaso sa Covid-19 sa dakbayan nakasinati og pagkubos. Kini miresulta sa average nga 600 nga biyahe sa bus sa matag adlaw.
Ang ihap hapit nang miabot og 700 hangtud 800 matag adlaw, samtang moabot pa kini og kapin 1,500 nga mga biyahe sa bus panahon sa "peak" o "holiday seasons."
Sa miaging paghinabi kang Usop, gibutyag niini nga ang mga biyahe sa bus nga nagasulod ug naggawas sa dakbayan miubos tungod sa pag-istrikto sa mga border controls.
Si Davao City Mayor Sara Duterte-Carpio miisyu niadtong Mayo 8 og executive order nga nagsagop sa Joint Regional Interagency Task Force for the Management of Emerging Infectious Diseases-Regional Task Force Against Covid-19 (RIATF-RTF) 11 Resolution 01 series of 2021.
Ang pagpahuot sa pagkontrola sa regional borders nahimong epektibo sa Davao City niadtong Biyernes, Mayo 14, 2021.
Kini nagpakubos sa biyahe sa mga bus sa matag adlaw og 300 hangtud 400.
"Nung nag-declare naman tayo ng MECQ, lalong bumaba. From 300 to 400 [bus trips], our recent number of trips is nasa (now at) 180 plus lang tayo (up) to 200 plus ang pinakamataas na bus trips a day natin. Grabe ang pag-decrease," tug-an ni Usop sa virtual presser niadtong Biyernes, Hunyo 11.
Ang sitwasiyon sa Davao City niepekto niadtong Hunyo 5, ug matapos sa Hunyo 20. Kini tungod sa kasamtangang pagsulbong sa mga kaso sa Covid-19 sa dakbayan.
Apan bisan pa sa "income-generating" nga buhatan sa kagamhanan, gisulti ni Usop nga kasamtangan, ila sab nga gi-discourage ang di mga esensiyal nga mga biyahe tungod sa pagsaka sa ihap sa mga kaso sa Covid-19 sa dakbayan.
"We are catering passengers not only from Davao City, but also the entire Mindanao, including Visayas and Mindanao. But sad to say, kung pwede lang, kung hindi importante, huwag na lang tayong mag-travel for your safety," dugang sa opisyal sa Dcott.
Iya sab nga gi-discourage ang mga drayber sa bus nga magpasakay og pasahero sa dalan. Kay ang mga bus magkarga lang og mga pasahero gikan sa terminal-to-terminal.
Kini subay sa mga sumbanan sa Inter-Agency Task Force on Emerging Infectious Diseases (IATF) ug Land Transportation Franchising and Regulatory Board (LTFRB).
Apan bisan pa sa polisiya, kanunay gihapon silang makadawat og mga taho nga mga drayber nagsupak sa maong sumbanan.
"Naghimo ta og move. We coordinate with LTFRB. Nag-request gyud ta sa ilaha na mag-conduct sila og surprise monitoring diha sa highway, aron makita pud nila unsa ka-tinuod kaning pag-pick up sa mga bus nato sa kadalanan," pagtataw sa opisyal.