SUPERBALITA DAVAO

Roldan: Mayor Sara Duterte Advocates (Masada)

Nota Bene

NIARANGKADA na ang pagbakuna sa nasud. Nangabot na ang bakuna nga atong giangkat sa laing nasud para sa mga Pinoy. Nalipay kita niini bisan kon ika-8 ang Pilipinas sa mga nasud sa Southeast Asia sa gikusgon sa pagbakuna.

Gibalita nga nag-una ang Singapore sa gidaghanon sa ilang population nga nakabakuna nga niabot na'g sobra 49 porsyento.

Hinuon, gamay ra ang population sa maong nasud gawas nga kuwartahan sab mao nga dali ra silang nakaabot sa maong porsiyento.

Nikabat lamang og halos four percent ang Pilipinas apan posibleng motaas kini sa pag-abot sa daghang suplay sa mga mosunod nga semana.

Hangtud karon nag-alanganin pa ang kadaghanan tungod sa posibleng dautang "side effects" niining mga bag-ong bakuna.

Sa laing bahin, ninggimok na sab ang galamay sa politika sa nasud. Gawas sa kontrobersiyal nga National Council meeting sa PDP-Laban didto sa Cebu City, naa say balita nga magpahigayon og panagtigom ang ubang nasyonal ug lokal nga partido politikal.

Si PRody Duterte mismo, bisan giingon nga di na siya modagan, iyang giagni si Wilfredo Buendia Revillame o naila sa TV nga "Kuya Wil" nga modagan pagka-senador. Aduna daw lugar kaniya sa iyang partido kung modesisyon kini nga moapil sa politika.

Bilib ang pangulo sa paagi ni Kuya Wil sa pagtabang sa katawhan busa andam siyang makipagkita sa naulahi aron hisgutan ang iyang politikanhong plano.

Aduna nay mga iladong pangalan nga maapil sa listahan ni PRRD para sa senado samtang hinay-hinay na sab nga nigawas ang mga pangalan sa oposisyon.

Sa akong tan-aw maglisud ang oposisyon nga mangita og seryusong kandidato pagka-pangulo kung modagan gayud ang "presidential daughter" ug Davao City Mayor Sara Z. Duterte-Carpio.

Ang dakong pangutana kay kung modagan ba siya kay hangtud karon gilimod ni Mayor Sara nga interesado siya sa puwesto?

Bisan ang iyang amahan nisugyot nga dili na siya modagan pagka-pangulo kay dili daw "pangbabaye" ang pagka-presidente.

Segurado akong motaas ang kilay sa atong mga "women's rights advocates" kay nasayod kita nga duha na ka babayeng pangulo ang niserbisyo sa nasud.

Apan bisan niini, wala nagpadaug ang mga suporter ni Mayor Sara busa human sa Run Sara Movement, ilang gitukod ang Mayor Sara Duterte Advocates (Masada) aron iduso ang iyang kandidatora.

Niadtong Sabado, gihisgutan usab sa Executive Committee sa PDP-Laban Davao City Council ang pag-anib niini sa Masada aron pakusgon ang suporta sa kandidatura ni Mayor Sara.

Niadtong Mayo 31, 2021, nagpaguwa ang PDP-Laban Davao City ug Igacos Councils og "joint statement" nga nanawagan nga modagan si Mayor Sara pagka-pangulo. Pakusgon usab sa Masada-PDP Laban tandem ang pag-organisa ug pagpalig-on sa tanang chapters sa PDP-Laban sa rehiyon aron mosalmot sa paningkamot nga mapadayon ang gitawag nga "Duterte legacy" pinaagi sa paglingkod ni Mayor Sara sa Malacanang.

Sa akong tan-aw dili lisud nga pakusgon ang Masada kay gawas nga anak siya ni PRody, lahi sab ang iyang personalidad ug paagi sa pagpamuno.

Kung ang iyang amahan nitutok sa isyu sa "peace and order," si Mayor Sara posibleng motutok sa pagpauswag sa ekonomiya sa nasud.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph