ANG City Planning and Development Office sa Davao City magpahigayon og lockdown sulod sa 14 ka-adlaw sugod Lunes, Hunyo 14, 2021.
Kini human pipila sa ilang mga personahe nag-positibo sa Covid-19.
Sa usa ka pahibalo, nasayran nga puwede rang ibilin ang mga dokumento sa receiving tent kilid sa City Hall.
Alang sa ubang pangutana, puwede mo mag-message sa ilang Facebook.
Samtang sa Mati City, duha ka mga buhatan ang temporaryo nga gisira tungod sab sa kaso sa Covid-19.
Gisirhan sukad Hunyo 7 ang City Assessor's Office sud sa City Hall complex samtang apil sab ang City Health Office nga gisira, Hunyo 14.
Kini tungod kay pipila ka empleyado gikan sa maong buhatan ang nag-positibo sa virus.
Wala pa say pahibalo ang City Assessor's Office kanus-a sila subli nga magbukas samtang ang City Health manira lang og usa ka adlaw alang sa disinfection, diin mobalik ang ilang operasyon sa Hunyo 15.
Gibutyag ni Mayor Michelle Nakpil Rabat nga taliwala sa closure, pabiling magserbisyo ang ubang buhatan sa siyudad.
Niya, labaw nga importante sab nga maprotektahan ang mga empleyado ug ang publiko. (Jeepy P. Compio/CIO Mati)