Morag naputong na si Presidente Rodrigo Duterte sa kagahi sa ulo sa pipila ka mga tawo nga wala mosunod sa lagda kabahin sa mga health protocol aron malikay ang tinakdanay sa Covid 19. Gawas nga ipadakop sa Presidente ang mga gahi og ulo, labi pa kanang mosupak sa tapok-tapok, pasilutan gyud. Matod sa Presidente nga puwedeng ikiha og murder ang maong mga tawo kon masuta nga sila maoy hinungdan sa tinakdanay.
Ambot kon seryoso ba o nagkomedya si Duterte. Murder gyud? Base sa atong Revised Penal Code, Article 246, ang murder adunay mga elemento sama sa lipot, paggamit og superior nga kusog sama sa armas o hinagiban sa pagpatay. Ang homicide, pagpatay gihapon na apan mas bug-at ang murder kay sa homicide, hinungdan nga non-bailable offense ang murder.
Abogado ug kanhi piskal si Digong. Nasayod siya kon unsa ang balaod. Nahibawo man gani ko nga di abogado. Ang pagpatakod og makalilisang nga sakit sama sa Covid wala na o di man elemento sa murder. Unya imong ikiha ang tawo og murder nga walay igong basihanan? Gawas lang kon i-amendar o bag-uhon ang Revised Penal Code. Way klaro ning mga estorya sa Presidente. Morag “kuwentong barbero” lang. Kanang estorya ba sa tubaan.
Sukad sa pagsugod sa pamunuan ni Duterte niadtong sa 2016, nahimong lahi ug kulbahinam ang atong kinabuhi. Tungod kay hapit adlaw-adlaw maigking kita sa makapakurat nga mga pamahayag, pagbahad, pagpanulisok, pangasaba ug mga panghambog nga mga pamahayag sa Presidente.
Usahay nagtuo ta nga seryoso siya sa iyang mga pulong, apan komedya ra diay. Subo lang nga palandungonnga maoy labing dali nga mahinunduman sa katawhan ang imposible nga mga pamahayag ni Digong ug pakpakan pa.
Ang pagka-colorful o mabulokon sa iyang mga pulong maoy naghimo niyang labing lahi nga lider sa Pilipinas. Naukay kita, nangurog, natandog ug nalingaw sa iyang mga pulong. Pero lagi unta kaanidot kahang paminawon kon kining atong pagkalingaw mahubad ngadto sa matuod nga solusyon sa atong mga problema. Kay hangtod karon wa pa ta makairog sa unahan. (bobbygnalzaro@gmail.com)