Nahibalik na ang international flights sa Mactan Cebu International Airport (MCIA) sugod sa Dominggo. Apan gisundan usab kini sa mando ni Presidente Rodrigo Duterte sa pagpatuman sa protocol sa Inter-Agency Task Force for the Management of Emerging Infectious Diseases sa mga oversease Filipino worker (OFW) ug returning overseas Filipinos (ROF) dinhi.
Unsa may tumanon, ang ordinansa sa Lalawigan nga giamendahan sa Provincial Board (PB) niadtong Biyernes, Hunyo 11, 2021, o ang guidelines sa IATF subay sa mando sa Presidente?
Kaalyado baya sila si Duterte ug Garcia. Gani, nangampanya ang gobernador ug mga kaalyado nga niresulta sa 1 million kapin nga botos nga nakuha ni Duterte sa 2016 elections.
Kining kasungian karon sa health protocol posibleng makaapekto sa panag-alyado sa mga Duterte ug Garcia sa umaabot nga eleksyon kon di maayong pagka handle sa administrasyon karon nga klarong mopadagan kang Davao City Mayor Sarah Duterte sa 2022 elections. Posibleng sakyan kini sa ubang mga kandidato pagka presidente, sama kang Senador Panfilo Lacson ug Senador Manny Pacquiao.
Kay kon kinsa ang suportahan ni Garcia, dako kaayo og pabor nga makuha dinhi sa Sugbo tungod sa popularidad sa gobernador sa mga Sugboanon, labina ning iyang gipakitang matang sa liderato panahon ning coronavirus pandemic.
Nisamot pa ang iyang popularidad sa pagbarog sa gipatumang health protocol nga iyang gipatuman alang sa pagpagaan sa kinabuhi sa mga OFW ug ROF. Sa gibuhat sa Malakanyang sa pagpatipas sa international flights ug hinanggaw nga pamahayag ni Presidential Spokesperson Harry Roque nga ideya sa gobernador ang pagpatipas sa flights, nisamot ang paghugot sa simpatiya sa mga Sugboanon ngadto kang Garcia.
Sa umaabot nga eleksyon, magpadayon pa kaha ang suporta ni Garcia kang Duterte? Atanganan kaayo ni.