SUPERBALITA DAVAO

Dura: Hapsayon ang vaccination program

Ratsada

TUNGOD sa pagsaka sa kaso sa Covid-19 dinhi sa atong siyudad, nagkadaghan na ang buot magpabakuna karong panahona, ilabi na kadtong mga nagtrabaho sa nagkadaiyang kompaniya.

Ako kining nasayran gikan sa pipila nga akong nahinabi kinsa nipaambit sa ilang kasinatian isip mga "walk-ins" sa pipila ka vaccination sites.

Suma nila, nanimpalad lamang sila nga makapahimulos sa libreng bakuna aron di na sila mabalaka nga matakbuyan sa makamatay nga kagaw.

Sugilon pa nila nga ilang giantus ang kainit sa adlaw ug taas nga linya didto sa Davao City National High School vaccination site niadtong Biyernes, Hunyo 11.

Sa ilang paningkamot, nalista sila isip mga benepisyaryo, apan dimalas sanglit nahutdan sila og bakuna.

Tungod niini, nibalhin na sab sila sa Gaisano Mall vaccination site. Apan, bisan og nalista na sila niadtong adlawa, nahutdan gihapon sila og bakuna.

Duna say mga senior citizens nagsugilon nako nga bisan ila nang eskedyul niadtong Lunes, wa gihapon sila nabakunahan sanglit nahutdan og bakuna.

Ako kining gihisgutan karon tungod kay buot nakong ipaabot ang atong hangyo sa kadagkoang opisyal sa lokal ug sa nasyonal nga kagamhanan nga susihon ang ilang vaccination program.

Angay nga tukion kung unsa ang mga butang nga angay pa nilang hatagan og gibug-aton aron mas mahapsay ug mapadali ang pagbakuna sa mga Dabawenyo.

Kung nagkulang ang bakuna, nan, angay nilang dugangan pa ang ihap sa mga bakuna nga ialokar matag adlaw sa mga vaccination sites.

Kung kulang usab ang ilang mga personahe, nan, angay nilang dugangan ang mga health workers aron paspas ang trabaho, ug daghan ang mabakunahan nga mga tawo.

Kay kung kini ang kanunay nga mahitabo matag adlaw, unya di lang sab mohimo og maayong paagi ang mga hintungdan, mosamot kadugay mahuman ang vaccination program sa siyudad.

Giingon sa City Health Office nga gidili nila karon ang mga "walk-ins" sa mga vaccination sites aron di mosamot pagtinakdanay.

Kung nagkadaghan ang walk-ins, buot ipasabot niini nga nagkadaghan na ang mga Dabawenyo nga gusto na nga mabakunahan. Busa, angay nga mangita og paagi ang gobyerno nga maserbisyohan gayud ang katawhan sa luwas ug paspas nga paagi.

Unsaon nato pagkab-ot ang target sa gobyerno nga mabakunahan ang 1.2 milyon nga mga Dabawenyo ning tuiga kung di sila mangita og paagi nga mahimong paspas ug hapsay ang programa?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph