GITAKDA na sa lokal nga panggamhanan sa siyudad sa Davao nga sugdan na ang pagbakuna sa A4 priority group o ang frontline personnel sa essential sectors sa Hulyo karong tuiga.
Si Davao City Covid-19 Vaccine Cluster head Dr. Josephine Villafuerte nagsulti sa paghinabi sa radyo nga ang siyudad nangandam na sa pagbakuna sa A4 group human nangabot ang dugang mga bakuna sa dakbayan.
Niadtong Hunyo 10 ug 11, kinatibuk-ang 210,600 doses sa Pfizer-BioNTech BNT162b2 Covid-19 vaccine niabot dinhi.
Matud ni Villafuerte nga pipila ka mga kompaniya kasamtangang nangandam usab alang sa pag-abot sa ilang gipalit nga mga bakuna.
"We might open next month. Big companies are preparing their vaccination site and vaccination team. Ang ginahulat na lang kay vaccines nila kay they purchased man. So mag-abot man daw ang vaccines by third quarter this year, so most probably July," pagtataw sa opisyal sa panglawas sa paghinabi sa 87.5 FM Davao City Disaster Radio.
Hinuon, giklaro ni Villafuerte nga ang pagbakuna sa mga Priority Groups A2 (senior citizens) ug A3 (mga tawo nga dunay comorbidities) magpadayon bisan kung sugdan na ang pagbakuna sa A4.
Sa kasamtangan, ang siyudad dunay 20 vaccination sites. Apan giklaro ni Villafuerte nga nagtakda pa ang siyudad og dugang vaccination sites alang sa A4 group.
Gilauman sa opisyal nga dunay halapad nga vaccination coverage tungod sa pagdaghan sab sa ihap sa mga vaccinators.
Samtang gilauman sab ang pag-abot sa laing hugna sa Covid-19 vaccines, nga mao ang Sinovac, ug AstraZeneca. Gilauman sab sa Davao nga moabot ang unang hugna sa Moderna Covid-19 vaccines.
Mga kompaniya nga way badyet nga ipalit og bakuna, apil sa pagbakuna sa lokal nga panggamhanan.