Sugdan na sa batan-ong puwersa sa Gilas Pilipinas ang ilang kampanya sa 3rd window sa Fiba Asia Cup qualifiers karong alas 6:00 sa gabii, Hunyo 16, 2021, batok sa South Korea sa bubble set-up sa Clark, Pampanga.
Ang mga duwa sa kompetisyon isalida nga live sa TV5 unya i-replay sa sunod nga adlaw sa One Sports.
Mahimo sab kining makita sa online sa Cignal Play pinaagi sa website niini nga www.cignalplay.com o app nga mahimong ma-download sa Apple Store o Google Play Store.
Ang Smart subscribers mahimo sab makakita sa mga duwa sa Gilas sa cellphone pinaagi sa gigafest.smart.
Labing seguro, daghan ang nag-atang kon unsa’y ikatampo sa batan-ong Pinoy nga higante nga si Kai Sotto sa kampanya sa Gilas.
Pangulohan ni Sotto ang 12-man final lineup sa Gilas .
Pipila pa lang ka mga adlaw nga nakaaapil si Sotto sa training sa Gilas apan iyang gitataw nga dali ra siyang naka-adjust sa sestima ni coach Tab Baldwin.
Matod sa 7’3” ug 18 anyos nga basketbolista nga ang iyang pagkasuweto nang daan sa uban niyang mga kauban sa Gilas ug hasta ni assistant coach Sandy Arespacochaga nakatabang og dako aron mahangop dayon niya ang sestima ni Baldwin.
Kaabag ni sa paggiya sa Gilas mao ang naturalized player nga si 6’10” Angelo Kouame.
Gipasabot ni Sotto nga naghinamhinam na siyang makigtambayayong kang Kouame sa paggiya sa Gilas.
Sa 3rd window, nga maoy katapusang tipik sa qualifiers, ang Gilas adunay tulo ka mga tahas nga sagubangon.
Ikasangka nila og balik ang South Korea karong Hunyo 20, 2021 unya ilang ikaparang ang Indonesia karong Hunyo 18, 2021.
Ang Gilas, nga nakapundo na og 3-0 nga rekord gikan sa nag-unang duha ka mga tipik sa qualifiers, nagkinahanglan na lang og usa ka daog aron makaabante sa mismong 2021 Fiba Asia Cup nga gikatakda sa Indonesia karong Agusto ning tuiga. / ESL