Nagmalampuson ang gipahigayon nga duha ka adlaw nga Child’s Rights Advocacy Training nga gitambungan sa dul-an sa 20 ka mga partisipante niadtong Hunyo 12 ug 13, 2021 sa Bai Hotel, Dakbayan sa Mandaue.
Ang kalihukan giorganisa sa Children’s Legal Bureau (CLB) kauban ang KIYO Philippines.
Tumong sa training mao nga masayod ang youth participants sa ilang mga katungod isip mga kabatan-unan ingon man ang importansya sa adbokasiya sa pagpatuman sa child protection laws sa atong nasod.
Dakong bahin sa maong training mao ang pagtudlo sa mga kabataan kabahin sa mass media nga usa sa mga sektor sa katilingban nga epektibo sa pagpalanog sa mga adbokasiya sa kabataan.
Mao nga si Angelica Fay Saniel, usa sa mga inilang magsisibya sa Sugbo maoy nahimong training facilitator sa maong kalihukan. Si Saniel nailhan isip radio personality sa DYAB ug Sibya TV.
Iyang gitudluan ang participants kabahin sa nagkalainlaing klase sa medya sama sa print, radyo, ug telebisyon.
Duna poy gipahigayon nga mga workshop aron masukod kon nakat-on ang mga estudyante sama sa scriptwriting.
Samtang si Atty. King Anthony Perez, ang communications and advocacy officer sa CLB, maoy mitudlo sa mga misalmot kabahin sa United Nations Convention on the Rights of the Child (UNCRC) nga naglatid sa mga katungod sa matag bata ug maoy pundasyon sa mga balaod nga nagpanalipod sa mga bata diri sa Pilipinas.
Iya sab nga gihisgutan ang importansya sa adbokasiya ug ang saktong pamaagi sa pagsulat og mga official statements.
Gikan sa Barangay Paknaan ug Cambaro sa dakbayan sa Mandaue ang participants sa Child’s Rights Advocacy Training.
Nanghinaot ang CLB nga pinaagi sa maong training, makadasig kini sa mga kabatan-unan nga mahimong epektibo sa paghimo og advocacy activities ug projects sa ilang mga komunidad.
Padayon ang CLB sa pag-isa sa kaamguhan sa mga kabataan aron magmalampuson kita sa atong mga kampanya alang sa kaugmaon sa mga bata sa atong nasod.
[Mahimo kamo nga mupadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]