Tungod kay menos ra ang nagparehistro sa bakuna batok sa coronavirus disease sa isla sa Olango, Lapu-Lapu City Mayor Junard “Ahong” Chan sa isla magpaturok sa iyang second dose nga gitakda sa Hunyo 16.
Sa maong paagi, maghatag kini og kadasig sa mga Olanggohanon nga magpabakuna batok Covid-19
Sa kinatibuk-an moabot na hinuon sa 90,789 ka mga Oponganon ang nakaparehistro sa pagpabakuna batok sa Covid-19 sumala ni Chan apan kasagaran niini gikan sa mainland sa dakbayan.
Sa 90,789 moabot sa 22,264 ang nabakunahan na.
Sa 17,247 ang nabakunahan na sa first dose samtang 5,017 sa second dose. Si Chan naturokan na sa first dose sa Sinovac niadtong Mayo 19.
“One way of campaigning them nga magpa-vaccine na ta para sigurado nga mabalik na gyud atong industriya labi na sa turismo kay turismo baya gyud ang panginabuhian gyud sa Olango daghan nang turista mga local tourist nga nisuroy sa Olango pero mas maayo nang kita fully vaccinated,” matod pa ni Chan.
Samtang gipahibawo ni Chan nga nakadawat na ang kagamhanan og moabot sa 23,000 ka mga doses Pfizer nga bakuna gikan sa Department of Health DOH-7.
Ang naasoyng bakuna iturok sa kagamhanan sa mga Oponganon sugod sa Huwebes Hunyo 18 sa Hoops Dome ug City Auditorium nga mga vaccination site.
Gipasabot ni Chan nga kini maoy labing unang higayon nga manurok ug Pfizer ang kagamhanan sa mga vaccination site.
Sa miaging pagturok sa Pfizer nga bakuna didto kini gipahigayon sa Chong Hua Hospital sa Mandaue sanglit walay storage facility ang kagamhanan alang sa naasoyng bakuna. (GCM)