Nunot sa padayong pagsaka sa kaso sa coronavirus disease Covid-19 sa lalawigan sa Bohol, Negros Oriental ug Occidental hayan pangayoan na usab sa dakbayan sa Lapu-Lapu ang mga gikan sa naasoyng mga lugar og reverse transcription polymerase chain reaction (RT-PCR) test o ba kaha antigen test sa dili pa makasulod sa dakbayan.
Kini ang gipahibawo ni Lapu-Lapu City Mayor Junard Chan dihang nahinabi sa mga tigbalita.
Gawas sa tulo ka lalawigan gikatakdang pangayoan usab sa dakbayan ug RT-PCR test o ba kaha antigen ang mga gikan sa National Capital Region (NCR) Plus. Gikinahanglan nga sa 72 oras sa dili pa ang pag-abot kinahanglan adunay resulta sa RT-PCR test, samtang 24 oras ang sa antigen test.
Gipadayag ni Chan nga gumikan sa kamandoan sa Dakbayan sa Sugbo ug sa Probinsya sa Sugbo sa pagpatuman sa mao usab nga lagda nakasiguro siya nga niagi ug estriktong screening ang mga gikan sa Bohol, Negros Oriental ug Occidental sa dili pa moabot sa dakbayan.
Kasagaran niadtong gikan sa naasoyng mga lugar moagi sa mga pantalan nga anaa mahimutang sa dakbayan ug sa Probinsya sa Sugbo gawas kon via airline.
Giklaro ni Chan nga tanang mobiyahe sa dakbayan adto sa ilang gigikanan magpaubos ug test ug resulta lang ipakita sa tugpahanan sanglit walay gitaganang swab test alang kanila.
Sa mga returning overseas Filipino (ROF) ug overseas Filipino worker (OFW) gisanong lang ni Chan ang ilang swabbing ug protocol sa Mactan Cebu International Airport (MCIA) sanglit dili na sila ubos sa kagamhanan ug ubos na sila sa Department Of Transportation. (GCM)