Biktima sa salvage ang usa ka lalake nga napalgang patay Martes, Hunyo 15, 2021 sa alas 12:30 sa kaadlawon sa Transcentral Highway, Barangay Gaas, lungsod sa Balamban.
Si Police Executive MSgt. Benedicto Bobilles, imbestigador sa Balamban Police Station nga nahinabi sa Superbalita Cebu, niila sa biktima pinaagi sa iyang identification (ID) card nga si Warlito Laborte, taga Brgy. Suba, Dakbayan sa Sugbo.
Matod ni Bobilles nga dunay upat ka mga samad pinusilan si Laborte sa iyang lawas ug liog.
Narekuber nila sa crime scene ang upat ka mga kabhang sa bala sa kalibre .45 nga pistola.
Gipahibawo sila ni Kapitan William Genil sa Brgy. Gaas nga dunay usa ka patay nga tawo nga nakit-an sa kanal daplin sa TCH.
Duha ka mga barangay tanod sa dapit ang nakakita sa lawas.
Nag-roving ang duha ka mga tanod dihang ilang nakit-an sa unahan ang usa ka puti nga closed van duol sa dapit diin nakaplagan ang lawas.
Samtang nagsubay sila sa karsada padulong sila sa puti nga sakyanan, nabantayan nila nga kalit kini nga nipadagan padulong sa Balamban.
Sa pagsusi nila diin nag-park ang sakyanan, ilang nakit-an si Laborte nga patay na.
“Ato gitan-aw nga gi-salvage gyud ning biktima. Diri sab birahi kay makita man nga naay daghang kabhang sa bala,” dugang ni Bobilles.
Gipadayag niya nga ang mga tanod mitug-an nga wa sab sila nakadungog og buto niadtong higayun.
Sa pagsuwat ning taho, ilang gipaabot ang kabanay ni Laborte aron ilang makuhaag dugang mga detalye sa pagkatawo niini. (GPL)