Ang Cebu City Government makadawat og P5 milyones gikan sa Megawide Construction Corp. (MCC) pinaagi sa iyang subsidiary Cebu2World Development Inc. (C2W) sa dili pa mahuman ang 2021 isip inisyal nga bayad sa ilang pag-develop sa karaan nga Carbon Public Market.
Si Louie Ferrer, executive director for infrastructure sa MCC, nagkanayon nga sugdan sa C2W ang pagtiwas sa construction sa Unit 2 nga maoy magsilbing interim market nga balhinan sa 570 ka legitimate stall holders sa Warwick Barracks ug Freedom Park.
Matod niya nga way vendors nga makulban sa ilang mga kaldero labi na ang mga ambulant vendors sanglit mao kini ang tuyo ni Mayor Edgardo Labella.
Ang mga vendor nga maapil sa lista sa Market Operation Division (MOD) nga gipangulogan ni Irvin Cabales maoy ilang basehan sa pag-atiman sa mga manindahay aron makabaton og pwesto sa bag-ong Carbon Market.
Lakip sa gi-target sa C2W nga mahuman sa di pa matapos karong tuiga mao ang Puso Village, kansang lugar mao unya ang okupahan sa libuan ka ambulant vendors nga bahinon sa tulo ka shift, Sto. Niño Park and Chapel ug ang Parking and Transportation Hub nga maoy naglangkob sa phase 1.
Sa 2022, ang City Hall makadawat na usab og laing P14 milyones, P34 milyones sa 2023 ug P48 milyones sa 2024 ug di momenos P50 milyones sa 2025 nga maoy nagkumpleto sa ilang annual guarantee payment sa di pa mahingpit ang operasyon sa new Carbon Public Market.
Ang Annual Guarantee Payment (AGP) nga madawat sa Siyudad balor og P50 milyones, madugangan og 10% matag lima ka tuig, wa pay labot sa P20 milyones nga gibanabana nga kitaon sa Dakbayan gikan sa real property taxes, business tax ug ubang income.
Gipahibawo ni Ferrer nga ang tanan magdepende sa Market Code nga maoy magsilbing bibliya sa merkado nga ipaubos pa sa amendment sunod tuig.
Iyang gihulagway nga ang bayranan matag metro kwadrado maoy usa sa labing ubos nga presyo itandi sa samang pasilidad sa ubang local government unit.