Pastor sa usa ka simbahan nga nangankon nga daghan na og napatrabaho sa gawas sa nasud ang gidakop sa National Bureau of Investigation (NBI) 7 pinaagi sa entrapment operation human nga gireklamo nga giingong nangilad.
Ang dinakpan nailhan nga si Bernardo Albarando, 53, nailhan sab nga si Pastor Billy, taga-Barangay Langub, Lungsod sa Argao, Sugbo.
Matod ni NBI 7 Director Renan Oliva nga adunay tulo ka reklamante gipasaligan ni Pastor Billy nga patrabahuon sa New Zealand isip factory workers.
Gipangayoan silag tag P35,000 isip placement fee dungan sa pasalig nga sigurado sila nga makatrabaho ug magdawatan og sweldo nga 5,000 New Zealand dollars kun P178,000.
Apan sa dihang gisusi sa mga reklamante ang kompanya nga gipasi-atab ni Albarando nga maoy ilang trabaho-an pinaagi sa email mihimakak kini nga aduna silay gitugotan nga maka-recruit og trabahante hinungdan nga sila nagduda.