Halos di ko makatuo nga mobuhi og mga pulong si Atty. Nilo Ahat nga mao ang kasamtangan nga Provincial Legal Officer sa Bohol nga maghatag og kalibog sa mga tawo, labi na gyod sa mga batan-on.
Tiaw bay, matod pa ni Atty. Ahat, mahimo ra kuno mogamit og bisan dili lisensyado nga plaka ang usa ka sakyanan sa gobiyerno, bahala og nakalisensiya ang maong plaka sa lain nga sakyanan, sa lain sab nga lugar basta duna kini kalabotan sa trabaho sa migamit niini kalabot sa quarry operations sa probinsiya.
Kon ang nagsulti niini dili pa abogado, mahimo rang sabton kini.
Apan kon ang nagsulti niini abogado unya mao pa gyod ang legal officer sa lalawigan sa Bohol, hilabihan ka bakikaw ang maong pulong nga giluwatan ni Atty. Ahat.
Gilatid sa balaod ang pag-gamit sa husto nga plaka sanglit mao man kini ang maghatag og dentity sa maong sakyanan. Tungod niini, dili mahimo nga ilisan kini og lain, kay mausab na man ang identity sa maong sakyanan.
Unsa kaha nga balaod ang gisaligan ni Atty. Ahat?
* * *
Ang nakapait pa ra ba kay nadakpan sa Highway Patrol Group (HPG) ang sakyanan sa probinsiya nga naggamit sa dili lisensiyado nga plaka, ug dugang pa niini, usa ra ka plaka ang gigamit sa maong sakyanan imbes duha. Lain na sab kini nga kalapasan sa balaod.
Unsay gihimo ni Atty. Ahat?
Gipabuhian niya ang maong nadakpan nga sakyanan, gikasab-an pa gyod ang mga sakop sa HPG.
Susmaryusep.
Sobra na pod ni oi.
* * *
Usa kini sa mga init nga mga panghitabo sa Bohol nga nakapukaw kaayo sa mga katawhang Bol-anon.
Daghang mga katawhan ang naeskandalo niini.
Sa akong nahinumdoman, karon pa kini mahitabo nga gamiton sa usa ka opisyal sama kang Atty. Ahat ang pag-abusar sa gahom batok sa mga sakop ra sab sa HPG nga igo lang miresponde sa ilang trabaho.
Kon ingon niini ang pamaagi ni Atty. Ahat, makapaabot ba kita nga kanunay husto ug legal ang mga gipangbuhat ni Atty. Ahat?
* * *
Mas maayo unta kon ang mga sakop sa HPG mopahibalo sa ilang labaw sa maong panghitabo aron maimbestigar kini sanglit kalapasan sa balaod ang atong gihisgotan ug igo lang naghimo sa ilang trabaho ang mga taga HPG.
Maglisod na sa ilang trabaho ang taga HPG sa Bohol human niini kon dili nila kini tagdon kay moreklamo na man ang sunod nila nga madakpan.
Pilipili lang diay ang ilang dakpon bisan kon dunay kalapasan sa balaod?