Maayong niluwat na og opisyal nga pamahayag si Presidente Rodrigo Duterte sa iyang nakab-ot nga hukom bahin sa international arrival protocol sa Inter-Agency Task Force (IATF) for the Management of Emerging Infectious Diseases nga maoy masunod sa Mactan Cebu International Airport (MCIA).
Naklaro na ang miaging duha ka mga kamandoan gikan sa MalacaƱang sa pagpatipas sa inbound international flights sa MCIA ngadto sa Ninoy Aquino International Airport (NAIA).
Isip reaksiyon sa gipatuman ni Cebu Governor Gwendolyn Garcia nga swab-upon-arrival policy. Ang IATF nimando nga i-quarantine sud sa 14 ka adlaw sa overseas Filipino worker (OFWs) ug returning overseas Filipino (ROFs) nga i-swab adto na sa ikapito ka adlaw.
Human sa pamahayag ni Duterte, napawong ang tanan. Apan naobserbahan nga maayo og diskarte ni Gwen. Kalma lang. Lisod banggaon ang pangulo. Puwede siya pangitaan og bikil ug mahitabo ang nahiagoman niya niadto. Nakadumdom ba kamo sa kagubot sa Kapitolyo sa pagkasuspenso ni Gwen?
Ug sa Senate hearing kagahapon, Hunyo 15, bahin sa protocol sa IATF, gidapit si Gwen. Nipadayag siya sa pagtahod sa pamahayag sa presidente. Midapit sa mga sa IATF ug magtuki sa kahimtang sa Covid-19 sa Sugbo.
Sama sa mitumaw og balik ang kahiusahan. Apan nangalisbo ang pag-umido sa ilawom, lakip sa mga Sugbuanon nga hugot nga nagsuporta sa executive order (EO) 17 ni Gwen. Duna kini mga manifesto sa executives sa congressional districts, sa dakbayan ug kalungsoran sa Sugbo ug ang grupo sa mga abogado.
May epekto kaha kini sa eleksiyon sa 2022? Ang Sugbo nag-una sa labing dakong populasyon sa mga botante. Dinhi nakakuha si Duterte sa makabungog nga mayoriya. Mao ba kaha gihapon kini masinati sa iyang mga kandidato?
Ang pulitika puno sa diskarte. Mas moklaro kini sa umaabot.