SUPERBALITA DAVAO

Delos Reyes: Kinsa ang angay pilion?

Yanong Pagsabot

Maayong adlaw mga Super Suki.

Kumusta ang atong kinabuhi? Dili nato kalimtan kanunay ang pag-amping aron layo ta sa peligro ug sa balatian.

Wala pay kasegurohan nga mahuman na ang problema sa Covid-19 karong tuiga. Una nga magsagubang sa dakong suliran ang mga buot modagan alang sa umaabot nga eleksiyon sa 2022.

Posible nga sa social media lang mahitabo ang pagpangampanya aron agnihon ang katawhan sa pagpili sa ilang mga kandidato kon ugaling bawal gihapon ang panagtapok sa katawhan panahon sa kampanya.

Hangtud karon, wala pay klaro nga mga kandidato ang oposisyon apil ang 1Sambayan kay si kanhi Senador Antonio Trillanes ra ang nisulti nga andam siyang makigparang sa kandidato sa administrasyon aron putlon ang gahum ni President Rodrigo Duterte. Makuha kaha niya ang suporta sa mayoriya sa katawhang Pinoy?

Tataw nga ang mga isyu sa mga moatbang sa kandidato sa administrasyon maglangkob sa "Extra Judicial Killing, West Philippine Sea, problema sa panarbaho ug ang epekto sa pandemya sa Covid-19" ug uban pa.

Kon si Mayor Sara Duterte-Carpio ang mamahimong pambato sa administrasyon, makaapekto kaha kini nga mga isyu nga makapapukan kaniya?

Sa pagpanghilabot ni Vice President Leni Robredo sa kahimtang sa dakbaýan sa Davao kalabot sa pagdaghan sa nagpositibo sa Cocid-19, gipakita ni Mayor Sara nga andam siyang makigharong kang Robredo sa tukma nga panahon kon buot siyang modagan pagka-presidente sa moatbot nga eleksiyon.

Sa akong yano nga pagsabot dili makaapekto kang Mayor Sara ang mga isyu nga ginayawyaw karon sa mga kaatbang ni Pangulong Digong kay dili man kini isyu batok sa mayor.

Saksi ang mga molupyo sa dakbayan sa Davao nga bisan gikan sila sa usa lang ka pamilyang Duterte apan managlahi ang ilang estilo sa pagpadagan sa kagamhanan. Magkapareha ang ilang tumong sa pagserbisyo sa katawhan apan managlahi ang prinsipyo nga ilang baruganan.

Sa panahon nga mopuli si Mayor Sara sa lingkuranan sa iyang amahan sa City Hall sa dakbayan sa Davao, gipulihan sab niya ang mga nagagunit sa mga ahensiya sa gobyerno kay buot niyang makaseguro nga ang mga naa sa puwesto sa pagserbisyo iyang mga piniyalan. May kaugalingon siyang prinsipyo nga dili puwedeng hilabtan sa uban.

Ubay-ubay na sa suod ni Mayor Sara nga mga iladong politiko ang namahayag nga madayon ang pagdagan ni Mayor Sara pagka-presidente sa moabot nga piliay.

Halos nalukop sab sa "Run Sara Run" Movement ang tibuok nasud ug mga suok aron ipaila si Mayor Sara sa katawhan, hinungdan nga nadugangan ang pagkaila kaniya sa katawhan diin nag-una ang iyang pangalan sa mga nagustohan sa katawhan nga maoy mosunod nga presidente sa nasud sumala sa mga gipahigayon nga mga survey sa nakalabay nga mga bulan.

Dili sab makaapekto ang mga isyu nga ginalabay kaniya nga "Duterte Political Dynasty" ang mahitabo tungod walay balaod sa atong nasud nga nagdili sa pagsunod sa anak ug paryente sa pagpapuli sa mga posisyon sa gobyerno ug labaw sa tanan, katawhan man ang magbuot pinaagi sa eleksiyon.

Ang katawhan, gipul-an na sa lisud nga kahimtang ug dugay na nagahandom nga makalingkawas sa pag-ilaid, kinabuhi nga arang-arang kay sa kasamtangan.

Daghan ang nagatuo nga ang kalamboan makab-ot sa usa ka nasud diin tarong ang mga nagalingkod nga mga pangulo sa atong gobyerno.

Sa bahin sa katawhan, dako sab ang atong kapangakuhan. Dili nato isalig ang tanan diha sa kagamhanan, samtang kita mangiyugpos na lang.

Atong angay sabton nga ang kalamboan ug kalampusan atong makab-ot kon ang maayong plano sa gobyerno ubanan sa suporta sa katawhan, busa mamili ta og maayong lider sa umaabot nga eleksiyon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph