NAMATAY ang usa ka graduating student human nakuryentihan alas 10 sa buntag, Martes, Hunyo 15, didto sa Barangay Buayan, M'lang, North Cotabato.
Ang biktima mao si John Jay Bangcaya, 24, ulitawo ug nagpuyo sa Barangay Upper Glad 2, Midsayap sa nahisgutang probinsiya.
Matud ni Mary Joy Bangcaya Laurista nga mibisita ang iyang anak sa uyoan niini didto sa Barangay Buayan aron mangayo'g bugas.
Apan nagkasabot ang biktima ug mga anak sa iyang uyoan nga mangurenyente og isda sa punongan gamit ang live wire sa Cotabato Electric Cooperative (Cotelco) aron nga duna siyay madala sa pag-uli sa ilang balay.
Sa dihang maniudto na, gitawag sa uyoan ang ulitawo aron mangaon, apan subli niyang gisaksak ang kuryente.
Kalit lang mikirig ang biktima gumikan kay basa ang iyang lawas sa tubig.
Daling gitabang ang biktima sa iyang mga paryente ug gidala ngadto sa M'lang District Hospital apan namatay gihapon kini human nga makaangkon og mga paso sa lawas ug naputol pa ang mga dagkong ugat sa iyang ulo sa kakusog sa boltahe sa kuryente.
Grabeng kasubo ug pagmahay ang gibati sa inahan, mga paryente ug higala sa biktima nga gitakda unta nga mograduwar sa kurso nga Agriculture sa University of Southern Mindanao, Kabacan. (Edgar E. Fuerzas)