SUPERBALITA CEBU

Pulis: ‘ipabarang’ ang mga killer

Komedya o tinapulan nga estorya sa pulis?

Usa ka banay nidangop sa kapulisan sa Lungsod sa Alcoy, habagatang Sugbo human gipusil patay niadtong 2018 ang usa ka sakop sa pamilya, apan giingong gitambagan lang sila nga “ipabarang ang killers.”

Busa, sa ilang kahimangod, sa National Bureau of Investigation (NBI) 7 ningdangop ang pamilya hinungdan nga nailhan ug napasakaan og kasong murder ang upat ka gikatahapang killers, duha kanila nadakpan na sa kapulisan.

Bisan tuod kon 2018 pa kini nahitabo, ang liderato sa Cebu Police Provincial Office (CPPO) moimbestigar sa hitabo human nireklamo ang mga kabanay.

Si Rubelyn Mosqueda nga nahinabi sa sibyaanang dyHP nagkanayon nga niadtong Hunyo 2018 gipusil patay ang iyang maguwang nga si Armando sa upat ka mga lalake samtang padung mopauli sa ilang balay gikan namista.

Sa dihang nagpatabang na sila sa mga pulis sa Alcoy, gipangutana sila kon nakaila ba sila sa naghimo sa krimen.

Apan sa dihang wa silay ikahatag nga kasayuran, sila giingong gisultihan na sa usa ka pulis nga ipabarang na lang nila ang mga suspek.

“Among gi report sa kapulisan sa Alcoy kay magpatabang unta mi. Giingnan ra mi pagbalik, giari mi diri sa amoa pag 2 days, giingnan mi nga ‘Naa namoy nailhan nga suspek? ‘ Wala pa lagi, Sir. Nya giingnan ra mi niya nga ‘ipabarang lang to ninyo. Naa maoy kaila nga mambabarang?, “ kutlo ni Mosqueda sa pulis, kinsang ngan gipugngan una sa Superbalita Cebu.

Tungod sa ilang kasagmuyo, ila kini nga gidangop sa NBI 7 ug gipasakaan dayon nilag kaso ang mga suspek nga silang June Collins delos Santos, Mark Anthony Imperial, Harries Denolerao ug Paul Chris Custin.

Ang mga suspek nalutsan og warrant of arrest sa kasong order, apan duha lang kanila ang nadakpan niadtong Mayo 2021 sa Criminal Investigation and Detection Group 7 (CIDG) 7 nga silang delos Santos ug Imperial, samtang pabilin pa nga gawasnon sila si Denolerao ug Custin.

Human masayod ang hepe sa CPPO, Police Colonel Engelbert Soriano, iyang giawhag ang pamilyang Mosqueda nga makigkita niya aron mapaubos sa imbestigasyon ang pulis nga gipasanginlan.

Dugang ni Soriano nga kon tinuod ang pasangil sa pamilyang Mosqueda, mamahimong mag-atubang og kaso ang pulis sa kasong administratiba.

Sigun sa CPPO director nga kon tuohan ang pamahayag sa igsuon sa namatay, di makatarunganon ang gihimo sa pulis nga tambagan kini nga ipabarang na lang ang mga suspek.

“Unang una, napaka improper ng handling nila ng parties. Pangalawa uncalled for yung kanilang mga remarks kung totoo ito na sinabi nila. Hindi dapat lumalabas sa bunganga ng isang professional na police yan. Titingnan po natin lahat, siguro mag initiate ako ng investigation sa kanila,” matod ni Soriano.

Gimandoan ni Soriano ang Investigation and Detective Management Unit sa CPPO nga mosusi sa reklamo. Ang pulis nga gipasanginlan naa pa sa Alcoy police station, ipatawag alang sa imbestigasyon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph