COTABATO CITY -- Nakaikyas ang idlas nga drug dealer sa giluad nga buy-bust operation sa Philippine Drug Enforcement Agency-Bangsamoro Autonomous Region (PDEA-BAR) apan nasakmit ang gibanabana nga P3.4 kantidad sa mga shabu alas 2:00 sa hapon, Miyerkules, Hunyo 16, 2021.
Ang nakaikyas giila nga si Santokan Manrikayas, alyas Sonny Boy, nga molupyo sa Maguindanao Province.
Gibutyag ni PDEA-BAR Regional Director Juvinal Azurin nga nagpahigayon sila og buy-bust operation, uban ang kapulisan ug militar didto sa Barangay Poblacion, Talayan sa nahisgutang probinsiya.
Sa dihang itunol na unta ang shabu sa suspek, nakamatikod kini nga mga awtoridad ang katransaksiyon niini, hinungdan nga mikuripas og dagan.
Gigukod pa siya sa mga awtoridad apan wala na maabti human misum-ok sa hilit nga dapit sa Talayan.
Narekober sa mga awtoridad ang pito ka dagkong pakite sa shabu nga mitimbang og 500 gramos ug dunay kantidad nga P3.4 milyon, buy-bust money ug usa ka Honda Click nga motorsiklo.
Gipangita na sa mga awtoridad ang mieskapo nga suspek nga pasakaan og kaso nga paglapas sa Republic Act 9165 o Comprehensive Dangerous Drug Act of 2002. (Edgar E. Fuerzas)