BISAN wala ang usa sa ilang All-Stars nga si Kawhi Leonard, ang Los Angeles Clippers nakamaneho gihapon pagposte og makapakaging nga kadaugan batok sa host Utah Jazz, 119-111, sa Game 5 kagahapon, Hunyo 17, 2021 (RP time) sa Western Conference semi-finals series sa National Basketball Association (NBA).
Aron matapakan ang haw-ang nga nabiyaan ni Leonard, nagkumboya sila si All-Star Paul George, Marcus Morris ug Reggie Jackson aron hatagan ang Clippers og 3-2 nga bintaha sa best-of-seven series.
Si George nagpakatap og 37 puntos ug 16 rebounds, nidugang og 25 puntos si Morris samtang niamot og 22 puntos si Jackson aron pangulohan ang wala damhang kadaugan.
Wala nakaduwa si Leonard gumikan kay nakasinati kini og angol sa iyang tuhod sa Game 4.
Hinuon gipamatud-an sa Clippers nga aduna pa sila’y saktong ikabuga batok sa No.1 overall Jazz bisan wala si Leonard ug ilaha kining gipakita sa kinatibuk-ang kombati.
Ang Jazz gipangulohan ni Bojan Bogandovic pinaagi sa iyang 32 puntos lakip na niini ang siyam ka three-pointers, nidugang og 21 puntos si All-Star Donovan Mitchell samtang nihatag og 17 puntos si All-Star center Rudy Gobert.
Sa laing duwa, nagbangis si Trae Young ug nagpakatap kini’g 39 puntos aron paluparon ang Atlanta Hawks paingon sa makutas nga kadaugan, 109-106, nga kadaugan batok sa hosts Philadelphia 76ers sa Game 5 sa Eastern Conference semi-finals series.
Sa kadaugan, nakaposte na sab ang Hawks og 3-2 nga bintaha sa series. (AP)