NAPILI si Charlotte Hornets guard LaMelo Ball isip 2021 Rookie of the Year awardee sa National Basketball Association (NBA), pagbutyag sa NBA kagahapon, Hunyo 17, 2021.
Si Ball maoy ikatulong magduduwa sa prankisa sa Hornets nga ningdaog ning maong pasidungog sunod nila ni Larry Johnson (1991-92) ug Emeka Okafor (2004-05).
Ang 19 anyos nga si Ball nakadawat og 84 first-place votes ug nakarehistro og 465 total points gikan sa grupo sa 99 sportswriters ug broadcasters sa nagkalainlaing suok sa kalibutan.
Nalupig ni Ball sa inilugay ning maong pasidungog ang laing mga kandidato nga sila si Sacramento Kings guard Tyrese Haliburton ug Minnesota Timberwolves guard Anthony Edwards.
Si Edwards nakatigom og 15 first-place votes ug 309 total points samtang si Haliburton nakapundo og 114 total points.
“The honor is probably something I’m never going to forget,” matod ni Ball.
Gipasabot ni Ball nga ang pasidungog nakahatag kanila og dugang og kadasig alang sa umaabot.
“Definitely next season I want to come in with this little boost and pretty much looking forward to next season now,” dugang ni Ball.
“That’s what we’re all working out for. That’s what we’re all here for. Pretty much just trying to get better every day,” matod niya. "The team is in Charlotte for offseason workouts.”
Si Ball, kinsa maoy 3rd pick overall sa Hornets sa miaging tuig, nag-average og 15.7 puntos, 6.1 assists, 5.9 rebounds ug 1.6 steals sulod sa 51 ka mga higayon niyang pagduwa sa kasamtangang season. (AP)