PROTEKTAHAN sa Gilas Pilipinas ang ilang limpiyong rekord sa ilang pagpakigabtok sa Indonesia karong alas 6:00 sa gabii, Hunyo 18, 2021, sa ikaduha nilang tahas sa ikatulo ug katapusang tipik sa 2021 Fiba Asia qualifiers sa AUF Gym sa Clark, Pampanga.
Kon buot hunahunaon, wala na’y bili alang sa Gilas kining sangkaa tungod kay naka-qualify na man sila sa mismong Fiba Asia tournament human nila gipakaging ang South Korea, 81-78, sa premiro nilang tahas sa qualifers 3rd window niadtong Hunyo 16, 2021 pinaagi sa buzzer-beater three-point bomb ni SJ Belangel.
Apan labing seguro, dili molugak bisan gamay ang batan-ong puwersa sa Gilas gumikan kay nagkinahalan pa sila og dugang kasinatian isip usa ka puwersa.
Ang Gilas kasamtangang adunay 4-0 nga rekord sa qualifiers diin naglakip niini ang mga resulta sa nag-unang duha ka mga tipik sa qualifiers.
Ning sangkaa, isukip na sa lineup sa Gilas sila si Lebron Lopez, Geo Chiu, ug Fil-Australian Jordan Heading isip hulip nila ni Javi Gomez De Llano, Jaydee Tungcab, ug Mike Nieto.
Gipasabot ni Gilas coach Tab Baldwin nga iyaha na untang paduwaon si Heading batok sa South Korea apan wala lang siya moahat tungod kay nakasinati kini og angol (bat-ang) atol sa ilang bubble training. Ning higayuna, gipaneguro ni Baldwin nga hingpit nang naalim ang angol ni Heading. (ESL)