NAGKAPUNDOK ang pipila ka sakop sa E-Group niadtong Dominggo alang sa press conference sa “Ang Pagbalik,” and teledrama nga sinulat ug gidirihir ni Sam Costanilla.
Didto gihimo sa Soul Sierra mountain resort ang kalihukan lapas sa Temple of Lea ang lugar nga nindot kaayo kay daghang tanom ug kahoy ug, syempre, bugnaw ang palibot.
Nitambong sila si Dan Sy Lopez, Dante Luzon, Atty. Win Prada, Joan Flores, Niña Alaura, Lorenz Evangelio , Lorna Traya (prodyuser) ug Charlita Muego (co-producer).
Karong Dominggo na, Hunyo 20 (6:00 pm) ang unang pagsalida kay Fathers’ Day presentation kini. Isalida kinig balik sa Hunyo 21 (4:00 pm) ug Hunyo 22 (8:00 pm) sa Help TV Facebook.
Namahayag si Ms. Muego nga mosuportar siya mga proyekto nga ingon niini.
Si Sam namahayag usab nga sugod ning maong proyekto, matag buwan na siya magpasundayag.
***
Dunay bag-ong kanta ang talent sa Curve Entertainment Inc. nga si Zildjian nga nag-ulohan Huling Patak ng Luha. Makapahinumdom kini nako sa kanta ni Eric Clapton kanhi nga Tears in Heaven.
Parehas duha ka kanta kay kini namugna tungod sa pagkamatay sa mga anak sa duha ka mag-aawit. Samtang aksidente ang namatyan sa anak ni Eric, leukemia ang sa kang Zildjian.
Gani kining awita iyang gipadungog atol sa haya sa iyang anak. Whew! Kasakit! Duna nay mga nahimong awit ug jingle si Zildjian kinsa nagtrabaho sa usa ka hotel sa Korea sa wa pa ang pandemic.
Ang Huling Patak ng Luha maoy debut single ni Zildjian ug ma-steam ug ma-download sa tanang digital platforms sa tibuok kalibutan.
***
Di gyud matag-an ang dagan sa panahon. Niadtong bag-o lang nag-lockdown tungod sa pandemic, gi-bash si Kim Chiu tungod sa iyang pamahayag nga “batas sa classroom” nga “huwag lumabas.”
Nakapatulo usab og luha si Kim tungod sa maong hitabo apan nakabarug siyag balik nga mapagarbohon dihang gihimoan kinig awit sa usa niya ka magdadayeg ug ni-hit sa mga mahiligon.
Karon mahimo pa gyud kining teleserye nga magsugod di madugay. Kon ang gaba di magsaba, labina gyud ang swerte.
***
Duha ka Dominggo ang nilabay, nakita nako si KZ Tandingan nga nipasundayag sa ASAP Natin ‘To.
Inila kini siya nga maayong mokanta kay na-grand prize winner god ni siya sa usa ka bangga sa Kapamilya Network kanhi.
Ang di lang nako ganahan ani niya mao ang iyang mga gisul-ob sa tablado samtang magpasundayag.
Morag “inamaw” alang nako pero wa na kini mahitabo sa iyang pagkanta sa ASAP.
Maayo na lang!