SUPERBALITA CEBU

Rabacal: Pulitika sa Sugbo

Pakabana

SAMTANG mibukal na ang pulitika alang sa pagka-presidente sa nasud, mihinayhinay usab og tuyhakaw ang mga mokandidato sa nagkalainlaing pwesto dinhi sa Sugbo.

Tungod sa pagbakasyon ni Cebu City Mayor Edgardo Labella og dugang tulo ka semana, ang mga balhibuon og dila sa city hall, labi na ang kaatbang sa mayor, nagpalakaw na og tabi nga dakung masakiton si Labella ug dili na magpasubli pagka-mayor. Ang mupoli kaniya mao kuno si Bise Mayor Mike Rama.

Apan kon mahitabo kini natural nga molansar siya ubos sa Team Rama. Kon mao, dili kaha mangita og laing kandidato pagka-mayor ang PDP-Laban nga ipares kang Konsehal Raymond Garcia? Posible kaha nga suportahan sa Team Rama ang Ping Lacson-Tito Sotto tandem?

Sa laing bahin, gituhoan nga dili na modagan pagka-mayor si Tomas Osmena. Pilian na lang sa BO-PK sila si Konsehal Franklyn Ong ug Kongresista Bebot Abellanosa pinaagi sa survey. Kon mahinayon sa pagdagan si Senador Manny Pacquiao pagka-presidente, gipaabot nga siya maoy suportahan sa BO-PK.

Mas alegre ang managan pagka-kongresista sa north district sa Cebu City. Nagpahibawo na ang anak ni kanhi gobernador Lito Osmena nga si Mimo nga interesado siya sa pwesto ni anhing kongresista Raul del Mar. Gihisgutan usab si kanhi konsehal May Ann de los Santos ug Cutie del Mar sa BO-PK. Samtang sa PDP-Laban, anaa sila si Konsehal Raymond Alvin Garcia, Konsehal Nina Mabatid ug actor Richard Yap.

Sa Mandaue City, murag mudagan pag-usab si kanhi mayor Luigi Quisumbing batok kang Mayor Jonas Cortes. Dili pa masiguro kon unsa ang daganan ni Lolipop Dizon. Samtang sa Lapu-Lapu City, return bout kini nila ni Mayor Ahong Chan versus ni Kongresista Paz Radaza. Murag battle royale kini karon kay wala na si Presidential Adviser Adelino Sitoy.

Sa lalawigan, wa na may mobarog kontra kang Gobernador Gwen Garcia.

***

Makalulouy nga palandungon ang sitwasyon sa political opposition ng 1Sambayan karon. Dili pa lang dugay, nipahibawo na sila og mga kandidato nga maoy pilian aron padaganon pagka-presidente ug bise presidente sa nasud. Ginganlan sila si Bise Presidente Leni Robredo, kanhi senador Antonio Trillanes IV, Senador Grace Poe, Kongresista Vilma Santos, Partylist Rep. Eddie Villanueva ug lawyer Chel Diokno. Apan wa pa gani mauga ang laway ni kanhi Foreign Affairs secretary Albert del Rosario, namalibad na ang kadaghanan sa gituboy. Ang mga mibalibad mao sila si Poe, Santos, Villanueva ug Diokno. Ang klaro lang gayud nga midawat sa hagit mao si Trillanes. Bisan gani si Robredo nagpanagana pa sa pagdagan pagka-presidente. Ang nakasayop lang sa convenors sa 1Sambayan kay ila dayong giitsa-pwera si Senador Manny Pacquiao. Siya unta ang adunay dakong kahigayunan nga makabuntog sa taga-administrasyon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph