SUPERBALITA CEBU

Barrita: Polio outbreak sa Pilipinas nabuntog

Tikdul-tikdol

GIPAHIBAWO sa World Health Organization (WHO) ug sa United Nations Children’s Fund (UNICEF) niadtong Hunyo 11 nga natapos na ang polio outbreak sa Pilipinas. Ilang gidayeg ang pagkombati sa gobyerno sa maong sakit taliwa sa Covid-19 pandemic.

Sa usa ka joint statement, ang WHO ug UNICEF niingon nga ang Department of Health (DOH) opisyal nga nihunong sa polio outbreak response sa Hunyo 3 ning tuiga kay wa nay nakit-ang kaso sa polio sa mga bata ug sa palibot human sa 16 ka buwan nga massive immunization campaign ug surveillance.

Ang polio virus grabe ka mananakod ug makamatay. Ang molahutay mahimong paralatiko ug di na makalakaw. Ang labing daling takdan mao ang kabataan nga nag-edad og singko anyos paubos. Wa pay tambal alang niini.

***

Ang DOH nipahibawo sa kalit nga pagtumaw sa polio virus sa Pilipinas niadtong Septyembre 19, 2019, human sa 19 ka tuig nga polio-free status. Gilusad dayon sa gobyerno uban sa WHO, UNICEF ug ubang nga partners ang usa ka nationwide polio campaign aron pagsanta sa pagkatap sa polio virus.

Mokabat sa 30 milyones ka oral polio doses ang gihatag sa kabataan sa tibuok Pilipinas bisan pa sa Covid-19 pandemic ug sa kahadlok sa mga ginikanan batok sa bakuna tungod sa Dengvaxia scare, sa bakuna batok sa dengue nga napalpak.

“This is a major win for public health and is an excellent example of what collective efforts can attain, even in the midst of the Covid-19 pandemic,” matod pa ni Dr. Rabindra Abeyasinghe, ang representante sa WHO dinhi sa Pilipinas.

***

Usa sa mga partners sa WHO ug UNICEF sa kampanya sa pagwagtang sa polio virus sa tibuok kalibotan mao ang Rotary International (RI) nga nakig-alayon sa maong mga organisasyon sa 35 na ka tuig.

Ang kampanya batok sa polio virus gisugdan ni Mateo Caparas, ang bugtong Pilipino nga nahimong presidente sa RI hangtod karon. Ug gisugdan ni Caparas ang pagbakuna batok sa polio dinhi sa Pilipinas niadtong 1979.

Ang mga Rotarians sa tibuok kalibotan niamot og 2.1 bilyones dolyares aron pagpanalipod sa tulo ka bilyon ka kabataan sa 122 ka mga nasod batok sa polio. Karon ang polio nagpabilin pa sa Afghanistan ug Pakistan.

(Disclosure: Ang kolumnista usa ka Rotarian ug kanhi presidente sa Rotary Club of Metro Cebu)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph