USA ang patay, duha ang nangaangol sa ambush sa ala 1:40 sa hapon sa Huwebes, Hunyo 17, 2021, sa man-made forest sa Campo 7, Lungsod sa Minglanilla, amihanang Sugbo.
Ang patay giila ni Police Staff Sergeant Junel Ater, desk officer sa Minglanilla Police Station, nga si Ryan Magtagad, 36, minyo, manindahay og nagkadaiyang mga baligyaon gamit ang motorsiklo, taga Barangay Tutay, Pinamungajan, Sugbo.
Naangol usab ang iyang kauban ug silingan nga si Romeo Panacine, 30, ulitawo.
Naangol si Romualdo Liones, 67, taga Barangay Nangka, Balamban, kinsa nagsakay og multicab dihang napagan sa iyang pag-agi sa dapit.
Si Ater wa makahatag og mga detalye diin nangaigo ang mga biktima.
Matod ni Ater nga sila si Magtagad ug Panacine gikan namaligya og folding chairs, Bluetooth speakers ug mga banig padung na unta mamauli.
Nangagi sila sa Manipis Road padung sa Dakbayan sa Toledo sa dihang gisundan sila sa upat ka mga tawo nga nag-angkasay sa duha ka mga motorsiklo, usa niini gihulagway nga Yamaha Nmax nga way plate number.
Sa pag-abot sa man-made forest, ang sakay sa Nmax namusil gilayon og una kang Magtagad, kinsa naigo sa nagkadaiyang bahin sa lawas ug namatay.
Ang laing duha nga nag-angkasay nagsilbeng lookout ug backup.
Matod sa usa ka saksi nga nihangyong di nganlan, gisunod pagpusil si Panacine, apan sa lubot ra kini natapsingan ug daling nakabangon ug nakadagan.
“Tas pagtumba sa isa (Magtagad), gigukod ang isa (Panacine) pero wala na nila mapatay. Pagpusil nila naigo. Natumba tas naka dagan sa daghang balay mao ang suspect ni backing na ug gibalik ang usa ug gitiwasan,” matod sa tinubdan.
Matod niya nga natapisangan lang sa lubot si Panacine.
Human namusil, namalik paingon sa Talisay ang mga killer.
Daling gidala sila si Panacine ug Liones sa tambalanan sa alisay.
Ang tinubdan niingon nga posibleng naalaang mga asset sa kapulisan sila si Magtagad ug Panacine sa mga durugista.
Nakaplagan sa crime scene ang 13 ka mga kabhang sa mga bala gikan sa wa pa matinong armas. / dugang taho ni REV