ANG oposisyon nga 1Sambayan (Isang Boto, Isang Bayan) mipagawas og listahan sa posibleng mamahimo nilang kandidato sa pagka-presidente ug bise presidente sa sunod tuig nga eleksiyon. Ang ilang pilian mao kining mosunod: Vice President Leni Robredo, kanhi senador Antonio Trillanes, Senador Grace Poe, Brother Eddie Villanueva, Atty. Chel Diokno ug Batangas Congresswoman ug aktres Vilma Santos. Pastilan no, wala na gyud silay mapili nga kanang de kalidad nga mga kandidato?
Posibleng ikabangga sa habig sa administrasyon mao si Davao City Mayor Sara Duterte o Senador Bong Go. Samtang ang ubang mga interesado mao sila si boxer/Senador Manny Pacquiao, Bongbong Marcos ug Senador Ping Lacson. Naa pa siguroy uban diha nga nagpahipi lang ug unya na modiga inig file na sa certificate of candidacy karong Oktubre.
Gusto sa oposisyon nga ila nga buntugon ang si bisan kinsang kandidato sa administrasyon o kanang suportahan ni Presidente Duterte. Kay si kinsa man ang suportahan ni Duterte mamahimong “tuta” o maimpluwensiya ra gihapon ni Digong. Aber, ato kunong hashasan kining maong mga personalidad ug ang ilang tsansa nga makadaug sa eleksiyon.
Si Vice President Robredo usa ka tikang na lang nang iya. Pero morag huyang man ug wala may nahimo sa iyang kasamtangang posisyon karon. Hinuon, unsa man iyang mahimo nga wala man siya hatagi og papel sa Duterte administration? Si Trillanes, wala man pod nay nahimo gawas sa pagsaba-saba batok kang Duterte.
Si Grace Poe, pildero naman na. Pilde man gani na siya niadtong miaging presidential elections nga unta popular pa siya niadtong panahona, karon na kaha? Si Brother Eddie Villanueva tarong nga tawo kay usa ka religious leader, apan pildero naman pod kaniadto.
Si Diokno maayong human rights lawyer, apan dili ilado. Pilde man gani siya niadtong midagan siya sa pagka-senador, pagka-presidente na ba pod kaha?
Si Vilma Santos maayong artista ug nahimong gobernador ug kongresista sa Batangas, apan makaya kaha niya ang pagdumala sa nasud? Morag wala man koy salig. Ako ra ni ha.
(bobbygnalzaro@gmail.com)