TRABAHO sa pulis ang pag-imbestigar sa usa ka krimen, nailhan man ang mga naghimo o di. Kon dunay gipatay ug wa mailhi ang killers, trabaho niya ang pag-ila pinaagi sa paghimo og makuting imbestigasyon.
Kon tinuod ang pasangil sa mga kabanay sa usa ka lalakeng gipusil patay niadtong 2018 nga gisultihan ra silang ipabarang ang killers human wa sila makahatag og mga ngan, nakadaut kaayo kini sa kapulisan.
Bisan kon moingon pa ang pulis nga komedya ang iyaha, di gihapon kadto angay sa usa ka ahente sa peace and order sa kagamhanan kay namatyan ang pamilya. Di lalim ang bation kon ikaw namatyan ug nangita ka og hustisya sa kamatayon aron pabayron sa kasal-anan ang mga sad-an. Di komedya ang hitabo.
Timaan sab kini sa tapulan nga pulis nga gusto lang nga sayon ang trabaho. Masulbad man gud kon tinud-on pagtrabaho ang imbestigasyon. Nganong nailhan man sa National Bureau of Investigation (NBI) 7 ang suspetsadong killers ug napasakaan og kaso? Tungod kay gitrabaho og tarong ang imbestigasyon.
Usa sa mga hinungdan kon nganong maglisod ang kapulisan sa pagsulbad sa mga krimen kay matod nila, kuwang og kooperasyon ang mga kabanay ug mga saksi way kooperasyon. Tungod ni sa kakuwang og pagsalig sa publiko sa kapulisan. Kadaghan sa krimen nga wa masulbad, labina sa mga pagpatay.
Mao na ang rason kon nganong bisag usaon pag pakita sa kapulisan sa civic nga mga buhat, sama sa pagpang-apod-apod og mga hinabang ug uban pang pampogi points, maglisod sila sa pagbawi sa imahen nga dugay na kaayong namansahan sa kapalpakan sukad pa kaniadto, kansang kamatuoran ang nagtipun-og nga krimeng wa masulbad.
Way public relations nga makalimpyo sa imahe sa kapulisan kon ang ilang mga ginsakpan magtinaspukan sa pagsulbad sa mga krimen.