Nagkaduol ang nasudnong eleksiyon sa Mayo 2022 ug ning sayo pa lang, ang kapulisan nangandam nang daan niini.
Si Police Colonel Engelbert Soriano, hepe sa Cebu Provincial Police Office (CPPO), niangkon nga dakong hagit alang kanila ang pagpuhag sa vote buying atol sa eleksyon sa sunod tuig.
Matod ni Soriano, high tech na sa panahon tungod sa electronic transfer sa kuwarta nga lisud na mahibaw-an kung ang usa ka politiko namalit og boto sa mga tawo.
Lisud usab pamatud-an ang pagpamalit og boto sa usa ka politiko tungod kay nagkinahanglan kinig lig-on nga ebidensya nga ang maong kandidato ang naghatag sa kuwarta, dason niya.
Dugang ni Soriano, dinhi masukod ang kapasidad sa Anti-Cyber Crime Group ug ubang unit sa PNP.
Tungod niini, mohimo og pagtuon ang kapulisan sa probinsya sa dili pa ang gitakdang pag-file sa certificate of candidacy ug piniliay sa sunod tuig aron aduna na silay makita nga pamaagi sa pagbabag sa vote buying.
Si Police Lieutenant Colonel Wilbert Parilla, deputy city director for operations sa Cebu City Police Office (CCPO), nagkanayon nga magpatudlo sila sa cyber crime unit sa PNP ug sa Criminal Investigation and Detection Group (CIDG) sanglit ila kining giestudyohan sa taas nga panahon.
Dugang ni Parilla nga ila unya nga hisgutan atol sa Cebu Bankers Club meeting kung unsaon sa pagsakop sa vote
buying gamit ang hightech nga pamaagi.
“We can also coordinate and top sa atoang bankers association because we have quarterly meeting with bankers. We will also ask them,” sigun ni Parilla.
Una nang mimando si Police General Guillermo Eleazar, ang bag-ong PNP Chief, sa pagpuhag sa vote buying ning nagkaduol na ang national ug lokal nga piniliay. / AYB