Ang paggamit og face shield gawas sa masks sagad sa pampublikong mga dapit, labina sa siradong mga espasyo, magpadayon. matod sa Malacañang sa Huwebes sa gabii, Hunyo 17, 2021.
Si Presidential Spokesperson Harry Roque Jr. niingon nga ang Inter-Agency Task Force (IATF) for the Management of Emerging Infectious Diseases nagkasabot sa ilang tigom sa Huwebes sa hapon sa pagrekomendar sa pagpadayon sa paggamit sa face shields sa sirado nga mga lugar sa ospital, tunghaan, trabahoan, mga balay patigayon,
pampublikong mga sakyanan ug terminals ug mga balay alampoanan.
Mga balay patigayon naglakip, apan di lang limitado sa, mga kan-anan, malls ug merkado publiko.
“While waiting for the President’s decision on the matter, the existing policy on the use of face shields remains in effect,” matod ni Roque.
Ang IATF nihimo sa rekomendasyon pipila ka mga oras human si Roque nikompirmar nga si Presidente Rodrigo Duterte niingon nga ang face shields kinahanglang gamiton lang sa mga tambalanan.
Ang IATF, nga gipangulohan sa Department of Health (DOH), morekomendar og mga polisiya nga may kalambigitan sa coronavirus disease 2019 (Covid-19) response ngadto kang Duterte.
MOSUNOD
Kon undangon ang paggamit sa face shield, ang Kagamhanan sa Dakbayan sa Sugbo andam untang mosunod.
Kana kon dunay kamandoan ang nasudnong kagamhanan, matod ni Acting Mayor Michael Rama kalabot sa pagsul-ob og face shield.
Si Rama nagkanayon nga sundon kini sa Cebu City sa higayon nga aduna nay pormal nga polisiya nga ipagawas ang IATF.
Sa iyang bahin, si Konsehal Joel Garganera, deputy chief implementer sa Emergency Operations Center, pabor sa pamahayag sa Presidente.
Apan kon mosakay og mga PUV, iyang gidasig ang mga tawo nga magsul-ob gihapon og face shield sanglit dug-ol ang matag pasahero. / PAC, MVI sa SunStar Philippines