HUMAN ang Digos City, ang munisipalidad na sab sa Bansalan sa Davao del Sur maoy pinakaulahing lokal nga panggamhanan nga gipailawom sa general community quarantine (GCQ) sugod Huwebes, Hunyo 17 hangtud Hunyo 30.
Subay sa Executive Order (EO) No. 29 nga giisyu ni Bansalan Mayor Quirina T. Sarte, giaprobahan sa Regional Inter-Agency Task Force (RIATF) ang hangyo sa lokal nga panggamhanan nga ibutang ang tibuok lungsod ubos sa GCQ tungod sa padayon nga pagtaas sa mga kaso sa Covid-19 sa lugar.
"The current cases have been constantly rising every day, causing alarm and concern to the locality and its constituents," tin-aw ni Sarte sa EO.
Gimando sa mayor ngadto sa tanang mga buhatan sa gobyerno ug pribadong establisemento nga mosagop sa "flexible, skeletal work schedule" ug "work from home schemes," depende sa panginahanglan sa institusyon ug establisemento.
"Business establishments who are non-compliant with the said rule may be dealt with accordingly with existing laws and ordinances and may be subject for revocation of permit and licenses," dugang sa EO.
Alang sa pampublikong transportasyon, maximum nga 50 porsiyento nga kapasidad nga polisiya alang sa pagkarga og pasahero ug "point-to-point schemes" giabiso ngadto sa tanang public utility vehicles (PUV), bus ug vans kinahanglan nga obserbahan.
Ang dine-in services sa mga kan-anan kinahanglan nga obserbahan sab.
Gipatuman sab ang 24-oras nga liquor ban ug curfew gikan sa alas 8 sa gabii hangtud alas 5 sa kaadlawon.
Misa ug uban pang relihiyusong kalihukan ug selebrasyon gitugtan hangtud lang sa 30-porsiyento nga kapasidad.
Panagtigum nga sosyal gilimitahan lang ngadto sa 25 ka mga tawo ug kalihukang relihiyuso kutob lang sa 30 porsiyento ang gitugtan.
Samtang ang contact ug non-contact nga paugnat sa kusog gidili.
Sukad Hunyo 18, ang Bansalan dunay kinatibuk-ang 296 nga kompirmadong mga kaso sa Covid-19, kon diin 60 niini aktibong kaso, ug siyam ang namatay.
Bag-ohay lang ang Digos City mibali ngadto sa GCQ tungod sa "exponential" nga pagtaas sa mga kaso sa Covid-19 sa lugar gikan Hunyo 14 hangtud Hunyo 27, 2021.
Samtang ang ubang mga lugar sa probinsiya kasamtangan nga ubos sa modified general community quarantine hangtud sa Hunyo 30.
Sumala sa datus sa Hunyo 17 sa Department of Health, ang tibuok probinsiya dunay kinatibuk-ang 2,540 kompirmadong mga kaso, kon diin 670 mga aktibong kaso, 1,790 nakarekober na, ug 80 ang namatay. (Ralph Lawrence G. Llemit)