Pamilya sa napatay nga mayor mopasaka og reklamo sa CHR

NAGBANGUTAN karon ang pamilyang Sabal ug mga tagasuporta sa kamatayon ni kanhi Talitay mayor Datu Montasir Sabal sa Maguindanao Province didto sa San Juan sa Metro Manila kaadlawon niadtong Huwebes, Hunyo 17, 2021.

Napatay si Sabal human giingong nangilog og armas sa mga pulis sa dihang dad-on na unta siya sa Camp Crame human madakpi didto sa Batangas Port, ug mga kaubanan.

Narekober sa mga pulis ang daghang mga armas apil na ang .50 caliber machine gun, shabu, dakong kantidad sa salapi ug mga personal nga kagamitan.

Nanganti ang pamilyang Sabal nga mopasaka og reklamo ngadto sa Commission on Human Rights (CHR) batok sa mga sakop sa kapulisan nga nakapatay kaniya.

Kahinumdoman nga si Montasir napiling mayor sa Talitay niadtong 2010 hangtud 2013.

Nakasilbi sab siya isip bise mayor sa lungsod samtang mayor sab ang iyang igsuon nga si Wahab Allan Sabal.

Napatay sad ang igsuon nga si Allan niadtong 2020 human gipusil sa mga armado nga lalaki didto sa Quiapo, Manila, hinungdan nga mihulip si Montasir sa pagka-mayor.

Human miulbo ang kagubot sa Talitay tali sa mga pamilyang Sabal ug armadong mga sakop sa Moro Islamic Liberation Front tungod sa dumot, miluwat sa katungdanan si Montasir karon lang 2021.

Gilambigit si Montasir sa pagpamomba sa Davao City niadtong 2016 ug naa sa narco-list ni Presidente Rodrigo Duterte.