Makakita pa og laing pagsidlak sa adlaw ang hosts Milwaukee Bucks human nila gipangmakmak ang Brooklyn Nets, 104-89, kagahapon, Hunyo 18, 2021, aron pagpugos og deciding Game 7 sa Eastern Conference semi-finals series sa National Basketball Association (NBA).
Pagsugod pa lang sa duwa, tataw ang determinasyon sa Bucks nga tablahon ang best-of-seven series hilabi na si Khris Middleton, kinsa nagbangis ug nagpakatap kini’g 38 puntos aron pangulohan ang kadaugan.
Ang 2-time MVP nga si Giannis Antetokounmpo niamot og 30 puntos ug 17 rebounds alang sa Bucks samtang nitampo og 21 puntos si Jrue Holiday.
“We don’t think about any type of pressure at all,” batbat ni Middleton. “It’s a basketball game. It’s as simple as that. I know it’s lose-or-go-home, but at the same time, it’s just basketball. You’ve got to have fun with it. Those moments are fun, you know, when the game’s on the line.”
Ning higayuna, gipaneguro sa Bucks nga dili mapapha ni Kevin Durant ug sa Nets ang narehistro nilang dako nga labaw sa sayong bahin ug nila tugoti ang Nets nga makagunit sa labaw gikan sa sinugdanan hangtod sa katapusang gutlo.
Sa Game 5, ang Bucks nakaposte og 17 puntos sa 1st half apan nausik kini gumikan sa kamangtas ni Durant, kinsa nipakatao pg triple-double record nga 49 puntos, 17 rebounds, ug 10 assists ning kombatiha.
Ning sangkaa, si Durant nimugna og 32 puntos aron pangulohan ang Nets, niamot og 16 puntos si James Harden samtang nidugang og 12 puntos si Blake Griffin. / AP