Mosuway pag-ambak sa conference finals ang Los Angeles Clippers ug Atlanta Hawks sa ilang pag-host sa mas inilog nilang mga kontra karong adlawa, Hunyo 19, 2021 (RP time) sa National Basketball Association (NBA) Playoffs.
Ang Clippers makigbatok sa No.1 overall Utah Jazz sa Game 6 sa Western Conference semi-finals series samtang ang Hawks makigdinagitay sa Philadelphia 76ers sa Game 6 sab sa ilang Eastern Conference semi-finals series.
Sa ikaduhang sunodsunod nga duwa, ang Clippers mokombati nga wala ang usa sa ilang labing mga sinaligan nga si Kawhi Leonard, kinsa naangol sa Game 4.
Hinuon napamatud-an sa Clippers nga bisan wala si Leonard, aduna gihapon sila’y saktong ikabuga pinaagi sa pagposte’g 119-111 nga kadaugan sa Game 5 nga naghatag kanila og 3-2 nga bintaha sa series.
Kon modaog ang Clippers karon, hayan makasulod sila sa conference finals sa labing unang higayon.