Makigbinukbokay na karong adlawa batok sa nagkalainlaong kontra ang walo ka nagpanikad nga mga boksidor sa bag-ong natukod nga ARQ Boxing Promotions sa “Engkuwentro I” boxing event nga ipahigayon karong adlawa pinaagi sa bubble set-up sa Gate 2 sa Cosonsa Manufacturing Compound sa Barangay Ibabao, dakbayan sa Mandaue.
Sulod sab sa pipila ka mga higayon nauswag kining labing unang boxing promotion sa ARQ hinungdan nga naghinamhinam na ang ilang mga boksidor nga makapakita og aksyon.
Si ARQ Sports Director coach Chelito Caro daan nang miingon nga pulos madasigon ang ilang mga boksidor hilabi na kay sakto kini og suporta gikan sa tag-iya sa ARQ Boxing Promotion nga mao ang magtiayong sila si Jason ug Eva Mari Arquisola.
Ang usa sa pambatong mga boksidor sa ARQ nga si April Jay “Astroboy” Abne makigbatok kang Royder Lloyd Borbon sa main event.
Si Abne, kinsa adunay 5-0, 2KOs nga rekord, mipasalig nga buhaton niya ang tanan aron masuklian ang suporta sa mga nagdumala kaniya.
Ang igsoon ni Abne nga si i Ian ug uban pang stablemates nga sila si Berland Robles, Zandro Librador, John Paul Gabunillas, Yerrodge Gura, Arniel Canete, ug Rodex Pala mopakita sab og aksiyon batok sa lainlaing kontra.
Aduna pa'y dugang mga parisan ang masaksihan sa promosyon. / ESL