Manglupad ang mga makusog nga kumo sa panagharong nila ni Japanese Naoya “Monster” Inoue ug Filipino Michael “Hot and Spicy” Mascariñas ugma, Hunyo 20, 2021, sa The Theater sa Virgin Hotels Las Vegas.
Mao kini ang paghulagway sa bantugang promoter nga si Top Rank boss Bob Arum kabahin sa gikaintapang away diin depensaan ni Inoue ang iyang World Boxing Association (WBA) ug International Boxing Federation (IBF) bantamweight titles.
“Monster is back in the United States, and he’s fighting a tough Filipino. And I know from experience how tough Filipino fighters are,” matod ni Arum atol sa usa ka press conference nga napatik sa www.philboxing.com.
“So this should be a very, very enjoyable fight. I can’t wait for Saturday night because the fists will be flying.”
Si Inoue, kinsa adunay limpiyong rekord nga 20-0, 17KOs, mosagubang sa iyang ika-15 nga world title fight.
Matod ni Inoue nga gusto niyang ipagawas ning awaya ang katakos nga maoy hinungdan nga gitawag siya og “Monster.”
Nagpasabot lang kini nga gusto niyang kulatahon og maayo si Dasmariñas, kinsa adunay 30-2-1, 20KOs nga rekord.
Si Dasmariñas mibahad sab nga iyang ipakita kon nganong gitawag siya og Hot and Spicy, nga naghulagway kon unsa ka halang ang bation sa kontra kon maigo sa iyang mga kumo.
Gipasabot ni Dasmariñas nga dugay ra niyang gihuwat nga makabaton og dakong away nga sama niini ug iyang gipasalig nga dili niya usikan kining maong oportunidad. / ESL