Albor: Duque, Año arogante

Milutaw ang pagkaarogante nila ni Department of Health (DOH) Sec. Francisco Duque ug Department of Interior and Local Goverment (DILG) Sec. Eduardo Año isip sakop sa Inter-Agency Task Force (IATF). Ilang paistaron sa hotel ang overseas Filipino workers (OFWs) ug returning overseas Filipinos (ROF). Sa ikapito ka adlaw una pa ipa-swab test. Kon negatibo dugangan ug laing pito aron pagkompleto sa 14 ka adlaw nga kwarintinas. Dili dayon makapauli sa ilang pamilya bisan dunay emerhensya o dinalian.

Dakog gasto ang gobyerno sa bayranan sa hotel sa mga OFW. Samot sa ROF kay sila maoy mobayad. Wala supaka ni Gov. Gwen Garcia ang maong lagda. Hinonoa iyang gi-modify, innovate o gipasayon kini.

Sa iyang Exec. Order 17 nga gisabak sa provincial board ordinance nagpamubo sa quarantine period. Inig abot sa OFW ug ROF sa Mactan Cebu International Airport (MCIA) ipa-swab test gilayon. Kon negatibo makapauli sa ilang pamilya ubos sa protocols sa ilang LGU.

Gidayeg ni Pres. Rodrigo Duterte nga pro-active si Garcia sa makatarunganong pagdumala. Gimandoan sila si Duque ug Año nga tun-an ang gisagop nga palisiya dinhi sa Sugbo. Apan ipatuman gyod ang lagda sa IATF nga unta lahi man ang sitwasyon sa Sugbo kon itandi sa ubang rehiyon nga nagsaka ang pandemya.

Gipanghadlok ni Duque ang lainlaing variants morag dili makadawat nga mawala ang Covid. Gani gisimang ang international flight ngadto sa Ninoy Aquino International Airport (NAIA). Kahinomdoman ulahing gisagop sa IATF ang sugyot ni Garcia bahin sa magtiayon o sakop sa pamilya nga makaangkas sa motorsiklo.

Mikuyog sa palisiya ni Garcia sila si DOH 7 Dr. Mary Jean Loreche, Sec. Michael Dino, mga mayor, walo ka kongresista, IBP-Cebu province lakip na si Senate President Tito Sotto ug ubang senador. Gani gidapit si Garcia sa Senate hearing kabahin sa vaccination program.