Usa si Lolo Semelio Cainglet 70, taga Barangay Guadalupe ang nakabenepisyo sa programang 'Gasa alang sa mga Amahan' nga gipasiugdahan sa Police Regional Office (PRO) 7 ug Cebu City Police Office (CCPO).
Matod niya nga bisan sa iyang pangidaron nagpadayon siyag pangargag utanon sa Carbon Public Market aron mabuhi.
Bisan sila sa iyang 60 anyos nga asawa sa panimalay sa Gudalupe apan wala siya mohunong sa iyang pag pangarga sa merkado tungod kay naanad na ang iyang lawas.
“lisud kaayo nang mag estambay lang ka sa balay ba nga wala kay lihuklihokon... matod ni Lolo Cainglet.
Nalipay siya nga gipasidunggan sa kapulisan ning panahon sa adlaw sa mga amahan tungod kay kini na ang labing unang higayon nga nakasinati siya niini.
Ugmang, Hunyo 20, saulogon sa tibuok kalibutan ang Adlaw sa mga Amahan diin pasidunggan ang ilang sakrepisyo nga gihatag sa ilang pamilya.
Apan ang kapulisan sa siyudad sa Sugbo sa pagpangulo ni Police Colonel Josefino Ligan ug ang hepe sa PRO 7 Police Brigadier General Ronnie Montejo mihimog kalihukan alang sa usa ka gatus ka mga amahan nga kargador sa Carbon Market.
Ang 'Gasa pasalamat alang sa mga amahan' nga gihimo sa Plaza Independencia diin adunay libreng tupi, hilot, medical check-up ug paghatag ug police clearance.
Gawas niini gipangtunolan usab silag hinabang alang sa ilang pamilya sama sa pagkaon ug uban pa.
Matod ni Ligan nga kapin sa duha ka gatus ka mga kargador sa carbon ang maka benepisyo sa gasa pasalamat sa CCPO.
Sila ang makita sa kadalanan nga bisan sa ulan og bisan sa kabug-at sa ilang gi karga wala nila baliha tungod ug alang sa ilang pamilya.
Si Police Lieutenant Colonel Regie Real sa Regional Community Affairs and Development Division nagkanayon nga pasiuna pa lamang kining maong programa sa
pnp sanglit aduna pay laing kalihukan nga mao ang pagtabang sa mga kaigsuonan sa Central Visayas.
Awhag sa kapulisan sa mga Sugboanon nga ning adlaw sa mga amahan ilang pasalamatan ug bawsan sa pagpangga ang ilang amahan. / AYB