Gipangtagaan og baruto, pukot, bugas ug tubig ni Kongresista Paz Radaza ang mga molupyo sa tulo ka islets nga sakop sa barangay nga isla sa Olango, kini ang sityo Caohagan, Caubian ug Pangan-an.
Nadesisyonan kini sa Kongresista human nga iyang nakita nga sagad sa panginabuhian sa mga molupyo sa isla mao ang pagpanagat.
Kadaghanan sa mga taga isla nga nawad-an ug trabaho gumikan sa pandemiya nagsalig na lang usab sa pagpanagat alang sa ilang inadlaw-adlaw nga panginabuhian sa mga molupyo.
Lisod usab sila sa tubig base sa mga yangungo sa katawhan ngadto kaniya.
Moabot sa 10 ka mga pumpboat ang gihatag ni Radaza sa mga molupyo sa Pangan-an, Coahagan ug 6 sa Caubian nga giapilan ug mga panggal usa ka matang sa kahimanan nga maoy gamiton pagkuha og lambay.
Moabot usab sa 145 ka pamilya sa Caohagan ang nakadawat ug tag 25 ka kilo nga bugas nga igo na aron makasapar sa ilang panginahanglanon.
Gipakapinan usab kini ug mga outdoor tent nga magamit sa kababayen-an sa ilang livelihood program.
Gumikan kay lisod ang tubig sa isla hayan giaporan usab sa kongresista ug tag lima ka container sa tubig ang mga molopyo sa Caubian samtang, laing 250 ka pukot ang madawat usab sa mga molupyo sa Coahagan.
Sa kinatibuk-an moakabat sa P800,000 ang gigahin sa kongresista sa isla gikan sa iyang personal nga pundo.
“Ang rason ngano baruto, fish net ug panggal maoy akong gihatag ngadto kanila tungod kay mao ni ang source sa ilang panginabuhian. Focus gyud ta sa
livelihood para sa mga tawo kay dako kaayo ni og tabang nila atong gihatag nga kaayohan,” matod ni Radaza sa Superbalita Cebu. / GCM